തിരുവനന്തപുരം ∙ കോവിഡിന്റെ അതിതീവ്ര വ്യാപനം കുറഞ്ഞതിനാല്‍ സംസ്ഥാനത്തെ സ്കൂളുകളിലെ 10,11,12 ക്ലാ‍സുകളും ബിരുദ, പിജി ക്ലാ‍സുകളും ഇന്നു തുടങ്ങും.
10,11,12 ക്ലാസുകള് മുഴുവന്‍ സമയ ടൈംടേബിളില്‍ രാവിലെ മുതല്‍ വൈകിട്ടു വരെയാണ്. പൊതുപരീക്ഷ വരുന്നതു കണക്കിലെടുത്താണിതെന്നു മന്ത്രി വി.ശിവന്‍കുട്ടി അറിയിച്ചു.
ഒന്നു മുതല്‍ ഒന്‍പതു വരെ ക്ലാസുകള്, ക്രഷ്, കിന്‍ഡര്‍ഗാര്‍ട്ട‍ന്‍ തുടങ്ങിയവ അടുത്ത തിങ്കളാഴ്ചയേ ആരംഭി‍ക്കൂ. ഒന്നു മുതല്‍ ഒന്‍പതു വരെ ക്ലാസുകളുടെ പ്രവര്‍ത്തനത്തിനു പ്രത്യേക മാര്‍‍ഗരേഖ ഇന്നു പുറത്തിറക്കും. കര്‍ശന കോവിഡ് മാനദണ്ഡം പാലിച്ചാണു സ്കൂളുകള്‍ പ്രവര്‍ത്തിക്കുന്നതെന്ന് ഉറപ്പാക്കാന്‍ ആരോഗ്യവകുപ്പും നിര്‍ദേശം നല്‍കി. ഒന്നു മുതല്‍ ഒന്‍പതു വരെയുള്ള ഓണ്ലൈന് ക്ലാസുകള് ശനിയാഴ്ച വരെ തുടരും.
10,11,12 ക്ലാസുകളില്‍ പൊതു പരീക്ഷ‍യ്ക്കു മുന്‍പ് എല്ലാ പാഠ‍ഭാഗങ്ങളും പഠിപ്പിച്ചു തീര്‍ക്കുക, റിവിഷന്‍ പൂര്‍ത്തിയാക്കുക, കഴിയുന്നത്ര പ്രാക്ടിക്കല്‍ നല്‍കുക എന്നിവ‍യ്ക്കാണു മുന്‍ഗണന. ഫോക്കസ് ഏരിയ‍യ്ക്കു പുറത്തുനിന്നുള്ള ചോദ്യങ്ങള്‍ വന്നാലും പ്രയാസം കൂടാതെ ഉത്തരമെഴുതാന്‍ കുട്ടികളെ പരിശീലിപ്പിക്കും.
കോവിഡിന് ശേഷം ആദ്യമായാണ് സംസ്ഥാനത്തെ സ്കൂളുകളില്‍ ഭാഗികമായിട്ടാണെങ്കിലും രാവിലെ മുതല്‍ വൈകീട്ട് വരെയുള്ള അധ്യയനം പുനഃരാരംഭിക്കുന്നത്. കാറ്റഗറി നിശ്ചയിച്ചുള്ള നിയന്ത്രണത്തില്‍ ക്ലാസുകള് നിര്‍ത്തിവെച്ച കോളജുകളിലും തിങ്കളാഴ്ച അധ്യയനം പുനരാരംഭിക്കും. കഴിഞ്ഞ നവംബറില്‍ സ്കൂള്‍ തുറന്നത് മുതല്‍ ഉച്ചവരെയാണ് അധ്യയനം അനുവദിച്ചിരുന്നത്. കോവിഡ് മാനദണ്ഡങ്ങള്‍ പാലിച്ച്‌ ബാച്ചുകളായുള്ള അധ്യയനം തുടരും.
എന്നാല്‍ 14ന് പുനരാരംഭിക്കുന്ന ഒന്ന് മുതല്‍ ഒമ്ബത് വരെയുള്ള ക്ലാസുകളുടെ നടത്തിപ്പ് സംബന്ധിച്ച്‌ തിങ്കളാഴ്ച ചേരുന്ന വിദ്യാഭ്യാസ വകുപ്പിന്‍റെ ഉന്നതതല യോഗത്തില്‍ ചര്‍ച്ച നടക്കും. ഈ ക്ലാസുകള്‍ക്ക് ഉച്ചവരെ അധ്യയനം നടത്താനാണ് ധാരണ. എന്നാല്‍ ബാച്ചുകളായുള്ള അധ്യയനമായതിനാല്‍ വിദ്യാര്‍ഥികള്‍ എല്ലാ ദിവസവും വരേണ്ടതില്ലാത്തതിനാല്‍ വൈകുന്നേരം വരെ ക്ലാസ് ദീര്‍ഘിപ്പിക്കുന്നതിന്‍റെ സാധ്യതയും പരിശോധിക്കുന്നുണ്ട്.
14 വരെ ഈ ക്ലാസുകള്‍ക്ക് ഓണ്ലൈന് ക്ലാസുകള് തുടരും. മാര്‍ച്ച്‌ അവസാനത്തിലും ഏപ്രിലിലുമായി പൊതുപരീക്ഷ നടക്കുന്നതിനാലാണ് പത്ത്, പ്ലസ് ടു ക്ലാസുകള് വൈകുന്നേരമാക്കുന്നത്. പിന്നാലെ പ്ലസ് വണ്ണിനും പൊതുപരീക്ഷ നടത്തേണ്ടതിനാല്‍ ഈ വിദ്യാര്‍ഥികളെയും വൈകീട്ട് വരെയുള്ള അധ്യയനത്തിന്‍റെ പരിധിയില്‍ ഉള്‍പ്പെടുത്തുകയായിരുന്നു. കോളജുകള്‍ക്ക് നേരത്തെ സര്‍ക്കാര്‍ ഉത്തരവ് പ്രകാരം നിശ്ചയിച്ച സമയപ്രകാരം തന്നെയായിരിക്കും ക്ലാസുകള്.
