ചുറ്റും നടക്കുന്ന പലതും നമ്മള്‍ കാണുന്നുണ്ടെങ്കിലും പലതും മനസ്സിലാക്കാന്‍ കഴിയാറില്ല. എന്തൊക്കയാ ഈ നടക്കുന്നതെന്ന് പല ആവര്‍ത്തി തലപുകയ്ക്കാത്തവരായി ആരും കാണുകയുമില്ല. ബാലഭാസ്കറിന്റെ വാഹനാപകടം നടന്നതിന് ശേഷം ആശുപത്രിയില്‍ നടന്ന പലതും കണ്ടിരുന്നുവെങ്കിലും ഒന്നും മനസ്സിലായിരുന്നില്ല. ബാലഭാസ്കറിന്റെ സഞ്ചയന ദിവസം പോലും എന്തൊക്കെയാണ് നടന്നത്. ബാലഭാസ്കറിന്റെ രക്ഷകര്‍തൃത്വം ഏറ്റെടുക്കാന്‍ ആരൊക്കെയാണ് മത്സരിച്ചത്. ഒടുവില്‍ സ്വന്തം മകനെ അവസാനമായി ഒരു നോക്ക് കാണാനെത്തിയ അമ്മയ്ക്ക് ‘ഞാനാണ് അവന്റെ അമ്മ’ എന്ന് ഉറക്കെ നിലവിളിച്ച്‌ കരയേണ്ടി വന്നു.
രക്ഷിതാക്കളും ബന്ധുക്കളും കെ സി ഉണ്ണിയാണ് ബാലഭാസ്കറിന്റെ അച്ഛന്‍, അമ്മ ശാന്തകുമാരി, ഒരു സഹോദരിയുണ്ട് മീര, പിന്നെ അമ്മാവനും ഗുരുവുമായ ബി ശശികുമാര്‍. പിന്നെ അമ്മയുടെയും അച്ഛന്റെയും ഭാര്യ ലക്ഷ്മിയുടെയും ബന്ധത്തിലുള്ളവര്‍. ഇവരില്‍ തന്നെയും ബാലഭാസ്കറിനെ സംബന്ധിച്ച തീരുമാനം എടുക്കാന്‍ അച്ഛനും
അമ്മയ്ക്കും ഭാര്യക്കും ഉള്ള അവകാശം കഴിഞ്ഞിട്ടേ സാധാരണ ഗതിയില്‍ മറ്റുള്ളവര്‍ക്ക് അവകാശം ഉണ്ടാവുകയുള്ളു. ബാലഭാസ്കര്‍ എല്ലാ കാലത്തും അനുസരിച്ചിരുന്ന അമ്മാവന്‍ ബി ശശികുമാറിനും പറയാം. എന്നാല്‍ ഇവരൊന്നുമായിരുന്നില്ല ബാലഭാസ്കറിന്റെ ആശുപത്രി കാര്യങ്ങള്‍ നിശ്ചയിച്ചതും നടപ്പിലാക്കിയതും.
രക്ഷിതാക്കളുടെ വേഷം അണിഞ്ഞവര്‍
2018 സെപ്തംബര്‍ 25ന് പുലര്‍ച്ചെ ബാലഭാസ്കറും കുടുംബവും സഞ്ചരിച്ച വാഹനം തിരുവനന്തപുരത്ത് പള്ളിപ്പുറത്ത് വച്ച്‌ അപകടത്തില്‍പ്പെടുന്നു. സംഭവം ആദ്യം അറിഞ്ഞവരുടെ കൂട്ടത്തില്‍ പൂന്തോട്ടം ആയുര്‍വേദ റിസോര്‍ട്ട് ഉടമ ഡോ. രവീന്ദ്രന്റെ ഭാര്യ ലതയാണ് ഒന്നാമതുള്ളത്. പിന്നീട് ലതയുടെ മകന്‍ ജിഷ്ണു, പ്രകാശ് തമ്ബി, അവരുമായി അടുത്തു നില്‍ക്കുന്നവര്‍.
മെഡിക്കല്‍ കോളജ് ആശുപത്രിയില്‍ നിന്നും പൊലീസില്‍ നിന്നും മാധ്യമങ്ങള്‍ക്കും വിവരം ലഭിച്ചു. സ്വകാര്യ ആശുപത്രിയില്‍ നിന്ന് സംഭവം അറിഞ്ഞവരുമുണ്ട്. അപകട വിവരം ഏറ്റവും ഒടുവില്‍ അറിഞ്ഞത് ഒരു പക്ഷെ കെ സി ഉണ്ണിയും മറ്റ് ബന്ധുക്കളുമായിരിക്കണം.
അറിഞ്ഞ കാര്യത്തിന്റെ നടുക്കം വൃദ്ധമാതാപിതാക്കളെ വിട്ടുമാറും മുന്നേ ബാലഭാസ്കറിനെ ഏത് ആശുപത്രിയില്‍ ചികിത്സിക്കണമെന്നും മകളുടെ മൃതശരീരം എവിടെ സൂക്ഷിക്കണമെന്നും ലക്ഷ്മിയെ ആര് നോക്കണമെന്നുമൊക്കെ പ്രകാശ് തമ്ബിയും പൂന്തോട്ടത്തിലെ ലതയും തീരുമാനിച്ചുവെന്ന് വേണം മനസ്സിലാക്കാന്‍ .
എല്ലാ കാര്യങ്ങളിലും ബാലഭാസ്കറിന്റെ പിതാവിനോട് അഭിപ്രായം തേടുന്ന വ്യക്തിയായിരുന്നു പ്രകാശ് തമ്ബി. എന്നാല്‍ ബാലഭാസ്കര്‍ അപകടത്തില്‍പ്പെട്ട ശേഷം പ്രകാശ് തമ്ബി കെസി ഉണ്ണിയോട് പെരുമാറിയത് വളരെ ക്രൂരമായിട്ടായിരുന്നു. ചികിത്സയ്ക്ക് ആശുപത്രി തെരഞ്ഞെടുത്തപ്പോഴെങ്കിലും തലമുതിര്‍ന്ന ബന്ധുക്കളുമായി കൂടി ആലോചിക്കാനോ ആശയ വിനിമയം നടത്താനോ ഇപ്പറഞ്ഞവര്‍ തയാറായിരുന്നെങ്കില്‍ ഫലം മറ്റൊന്നാകുമായിരുന്നു.
കൊച്ചുമകള്‍ മരിച്ചു, മകനും മരുമകളും ആശുപത്രിയിലെ അത്യാഹിത വിഭാഗത്തില്‍ മുറിപ്പെട്ട് കിടക്കുന്നു .ഈ കാഴ്ച കണ്ട് ആശുപത്രി വരാന്തിയിലേക്ക് വന്ന പിതാവ് കെ സി ഉണ്ണി അത്രയേറെ വിശ്വസിച്ചിരുന്നതുകൊണ്ടാണ് പ്രകാശ് തമ്ബിയെ പൊലീസ് സ്റ്റേഷനിലേക്കും മറ്റ് ആവശ്യങ്ങള്‍ക്കും ആദ്യം പറഞ്ഞുവിട്ടത്. എന്നാല്‍ ദിവസം ഒന്ന് കഴിഞ്ഞതോടെ ഹൈജാക്കിംഗ് സംഘത്തിലേക്ക് മറ്റ് ചിലര്‍ കൂടി വന്നെത്തി, സംഭവ ദിവസം വിദേശത്ത് ആയിരുന്ന
വിഷ്ണു സോമസുന്ദരമായിരുന്നു എത്തിയത്. പിന്നീട് പ്ലാനിംഗ് വേഗത്തിലായി.
ലക്ഷ്മിയുടെ വിരലടയാളം എടുക്കാന്‍ ശ്രമിച്ചത് എന്തിന് ?
ബാലഭാസ്കറിന്റെ അച്ഛനെയും അമ്മാവനെയും അവര്‍ തങ്ങിയിരുന്ന മുറിയില്‍ നിന്ന് പുറത്താക്കാനായിരുന്നു ആദ്യ ശ്രമം. അത് പരാജയപ്പെട്ടപ്പോള്‍ മറ്റ് രീതിയില്‍ മാനസിക പീഡനം തുടങ്ങി. ഇതിനിടെ ഒരു ദിവസം ലക്ഷ്മിയുടെ വിരലടയാളം ഐസിയുവില്‍ കടുന്നു കയറി ചെക്ക് ലീഫില്‍ പതിപ്പിക്കാനും വിഷ്മു സോമസുന്ദരം ശ്രമം നടത്തി. ഇത് ആശുപത്രി ജീവനക്കാര്‍ കയ്യോടെ പിടികൂടി. പിന്നീടാണ് ഐസിയുവില്‍ സന്ദര്‍ശകര്‍ക്ക് നിയന്ത്രണം ഏര്‍പ്പെടുത്തിയത്.
ലത-തമ്ബി-വിഷ്ണു കൂട്ടുകെട്ട്
ബാലഭാസ്കറിനെ ആര് കാണണം ആരു കാണരുത് എന്ന് തീരുമാനിച്ചരുന്നതുപോലും ലത -തമ്ബി- വിഷ്ണു കൂട്ട് കെട്ടായിരുന്നു. ബാലഭാസ്കര്‍ മരിച്ച ശേഷം ഹിരണ്മയയിലും
(തിരുമലയിലെ വീട്) പ്രകാശ് തമ്ബിയുടെ നേതൃത്വത്തില്‍ നാടകങ്ങള്‍ അരങ്ങേറിയിരുന്നു. ഹിരണ്മയയിലെത്തിയ അമ്മ ശാന്തകുമാരിക്ക് ഞാനാണ് ബാലഭാസ്കറിന്റെ അമ്മ എന്ന് അലമുറയിടേണ്ട സാഹചര്യമാണ് ഉണ്ടായിരുന്നത്. ബാലഭാസ്കറിന്റെ ബന്ധുവായ പ്രിയ വേണുഗോപാലും ലതയും തമ്മില്‍ വാക്കുതര്‍ക്കവും ഉണ്ടായി. തുടര്‍ന്ന് ലത പാലക്കാടേക്ക് മടങ്ങുകയും ചെയ്തിരുന്നു.
ലതയുടെ തിരിച്ചുവരവും സിസിടിവിയും
ബാലഭാസ്കറിന്റെ സംസ്കാരവും സഞ്ചയനവുമൊക്കെ കഴിഞ്ഞ് ലത മടങ്ങിയെത്തിയത്, ലക്ഷ്മിയെ പരിചരിക്കാനായിരുന്നു. ആശുപത്രിയില്‍ ലക്ഷ്മിയെ കാണാന്‍ പോയ ബാലഭാസ്കറിന്റെ കുടുംബത്തിനുപോലും ലതിയില്‍ നിന്ന് മോശം അനുഭവം നേരിട്ടിരുന്നു. ഇതിനിടെ തമ്ബിയും വിഷ്ണുവും ചേര്‍ന്ന് ഹിരണ്മയ സിസിടിവി നിരീക്ഷണത്തിലാക്കി, ആശുപത്രിയില്‍ നിന്നും മടങ്ങിയെത്തിയ ലക്ഷ്മിയുടെ സുരക്ഷക്കെന്നായിരുന്നു പ്രചരണം. വീടിന്റെ ഗേറ്റ് വലിയ താഴിട്ട് പൂട്ടി. സന്ദര്‍ശകര്‍ക്ക് വിലക്കേര്‍പ്പെടുത്തി. ലക്ഷ്മിക്കൊപ്പം കോളജില്‍ പഠിച്ചിരുന്ന കൂട്ടുകാരികള്‍ പോലും അപമാനിക്കപ്പെട്ടു. ഈ പരിചരണവും നിരീക്ഷണവും സ്വര്‍ണക്കടത്ത് പിടിക്കപ്പെട്ടതോടെ നിലച്ചു.
സംശയങ്ങള്‍ എന്തെല്ലാം ?
സൗഹൃദം എന്ന് പറഞ്ഞാല്‍ രക്ഷിതാക്കളെ അപമാനിക്കലാണോ ?
രക്ഷിതാക്കളെ ആട്ടി അകറ്റിയതിനു പിന്നിലെ കാരണം എന്തായിരുന്നു ?
സിസിടിവി നിരക്ഷണം എന്തിനുവേണ്ടിയായിരുന്നു ?
സന്ദര്‍ശ വിലക്കിന്റെ കാരണം ?
രക്ഷിതാക്കള്‍ ചമഞ്ഞവരില്‍ രണ്ട് പേര്‍ സ്വര്‍ണക്കടത്ത് കേസില്‍ പ്രതികളായത് എങ്ങനെ ?
ലത മുഖാന്തിരം ബാലഭാസ്കറിന്റെ സമ്ബത്ത് ഡോ. രവീന്ദ്രന്‍ കൊള്ളയടിച്ചുവോ ?
പ്രകാശ് തമ്ബി എന്തിനാണ് ബാലഭാസ്കറിന്റെ ബെന്‍സ് കാര്‍ കൊണ്ടു പോയത് ?
ലക്ഷ്മിയുടെ വിരലടയാളം പതിപ്പിക്കാന്‍ ശ്രമിച്ചത് എന്തിന് ?
ലക്ഷങ്ങളുടെ ഇന്‍ഷ്വറന്‍സ് പോളിസി വിവരം മറച്ചുവച്ചത് എന്തിനാവും ?
ഹൈജാക്ക് സംഘത്തെക്കുറിച്ച്‌ ഇത്തരത്തില്‍ നിരവധി സംശയങ്ങളാണ് പിതാവ് കെസി ഉണ്ണിക്കുള്ളത്. അദ്ദേഹം ഇക്കാര്യങ്ങളൊക്കെ ക്രൈം ബ്രാഞ്ച് സംഘത്തോട് പറഞ്ഞിരുന്നു. പക്ഷെ നടപടി ഉണ്ടായില്ല. ഇക്കാര്യങ്ങളൊക്കെ സിബിഐ സംഘത്തിന്റെ രണ്ടരമണിക്കൂര്‍ നീണ്ട മൊഴിയെടുക്കലിനിടെയും അച്ഛന്‍ ആവര്‍ത്തിച്ചു. ഏതായാലും നേരറിയാന്‍ സിബിഐ അന്വേഷണം പൂര്‍ത്തിയാകും വരെ കാത്തിരിക്കാം.
