കണ്ണൂര്‍: ഡിജിപി ലോക്നാഥ് ബെഹ്‌റ വിരമിക്കുന്ന ഒഴിവില്‍ സംസ്ഥാന പോലീസ് മേധാവിയായി ഡിജിപി ടോമിന്‍ ജെ. തച്ചങ്കരിയെ നിയമിച്ചേക്കും. നിലവില്‍ കേരള ഫിനാന്‍ഷ്യല്‍ കോര്‍പറേഷന്‍ സിഎംഡിയാണ് തച്ചങ്കരി. ഇതുവരെ വഹിച്ച ചുമതലകളിലെല്ലാം വിപ്ലവകരമായ മാറ്റങ്ങള്‍ കൊണ്ടു വന്ന തച്ചങ്കരിക്കു പോലീസ് ചീഫിന്‍റെ പദവിയിലെത്തുന്നതിനു തടസമായി നിന്ന കേസുകള്‍ ഉള്‍പ്പെടെയുള്ള കുരുക്കുകള്‍ ഒരോന്നും ഇതിനകം ഒഴിവായിട്ടുണ്ട്. തച്ചങ്കരിയെ പോലീസ് ചീഫിന്‍റെ പദവിയിലെത്തിക്കുന്നതിനായി അദ്ദേഹത്തിന്‍റെ പ്രവര്‍ത്തന മികവ് സംബന്ധിച്ച വിശദമായ റിപ്പോര്‍ട്ടും ഉന്നത തലത്തില്‍ ചര്‍ച്ച ചെയ്തതായാണ് അറിയുന്നത്. ഇതില്‍ കെഐസ്‌ആര്‍ടിസി എംഡിയായിരുന്ന കാലത്തെ തച്ചങ്കരിയുടെ പ്രവര്‍ത്തനങ്ങള്‍ എടുത്തു പറയുന്നുണ്ട്. വിജിലന്‍സ് ഡയറക്ടര്‍ സുധേഷ്കുമാര്‍, പ്രധാനമന്ത്രിയുടെ സുരക്ഷാ ചുമതലയുള്ള എസ്പിജി ഡയറക്ടര്‍ അരുണ്‍കുമാര്‍ സിന്‍ഹ എന്നിവരാണ് പോലീസ് മേധാവിയുടെ പദവിയിലേക്കു പരിഗണിക്കണിക്കപ്പെടുന്ന മറ്റ് രണ്ടു പേര്‍.
ലോക്നാഥ് ബെഹ്‌റ മാറുന്നു; ഇനി തച്ചങ്കരിയുടെ ഊഴം?
