കണ്ണൂര്: കെ എം ഷാജി എം.എല്.എക്കെതിരായ വധഭീഷണി കേസില് പ്രതിയായ കണ്ണൂര് പാപ്പിനിശ്ശേരി സ്വദേശി തേജസ് തലശേരി സെഷന്സ് കോടതിയില് മുന്കൂര് ജാമ്യാപേക്ഷ നല്കി.
തന്നെ വധിക്കാന് മുംബൈ അധോലോകത്തിലുള്ള ചിലര്ക്ക് 25 ലക്ഷത്തിന് ക്വട്ടേഷന് നല്കിയെന്നാണ് എം.എല്.എയുടെ പരാതി.
ക്വട്ടേഷന് നല്കാന് ഇയാള് ഫോണില് ബന്ധപ്പെട്ടതിന്റെ ശബ്ദരേഖ ഉള്പ്പെടുത്തി കെ.എം ഷാജി ഡി.ജി.പിക്കും മുഖ്യമന്ത്രിക്കും പരാതി നല്കിയിരുന്നു. ഇമെയിലിലാണ് തനിക്കെതിരെ ക്വട്ടേഷന് നല്കുന്നതുമായി ബന്ധപ്പെട്ട ശബ്ദരേഖ അയച്ചുകിട്ടിയതെന്നും ഗുണ്ടാസംഘങ്ങള് തമ്മിലുള്ള തര്ക്കത്തിന്റെ ഭാഗമായാണ് ഇത് ചോര്ന്നതെന്ന് കരുതുന്നതായും ഷാജി പരാതിയില് പറഞ്ഞിരുന്നു.
പ്രതി തേജസ് നിലവില് ഒളിവിലാണ്. ഇയാളുടെ മൊബൈല് ഫോണ് സ്വിച്ച് ഓഫാണ്. പത്തു വര്ഷത്തോളമായി ഗള്ഫില് ജോലിചെയ്യുകയായിരുന്ന തേജസ് രണ്ടുമാസം മുമ്ബാണ് നാട്ടിലെത്തിയത്. എം.എല്.എയുടെ പരാതിയില് കേസെടുത്തതോടെ മുംബൈ ബന്ധങ്ങളുള്ള തേജസ് അവിടേക്ക് കടന്നിട്ടുണ്ടാകുമെന്നാണ് സൂചന.