മുംബൈ: എവിടെ ആയാലും ഫിറ്റ്നസില്‍ വിട്ടുവീഴ്ചയില്ലാത്ത താരമാണ് ഇന്ത്യന്‍ ക്രിക്കറ്റ് ടീം നായകന്‍ വിരാട് കോഹ്‌ലി. പലപ്പോഴും സമൂഹമാധ്യമങ്ങളില്‍ താരം പോസ്റ്റ് ചെയ്യുന്ന വീഡിയോകളും ചിത്രങ്ങളും വര്‍ക്ക്‌ഔട്ട് പോലെയുള്ള കാര്യങ്ങളുമായി ബന്ധപ്പെട്ടതാണ്. അത്തരത്തിലൊരു വീഡിയോയുമായി ഇന്‍സ്റ്റഗ്രാമില്‍ എത്തിയിരിക്കുകയാണ് .
‘സാഹചര്യങ്ങള്‍ മാറിയേക്കാം എന്നാല്‍, നിങ്ങളുടെ ലക്ഷ്യങ്ങള്‍ മാറില്ല’ എന്ന അടിക്കുറിപ്പോടെയാണ് താരം വീഡിയോ പോസ്റ്റ് ചെയ്തിരിക്കുന്നത്. ഒരു സ്വകാര്യ സ്ഥാപനത്തിന്റെ പരസ്യചിത്രത്തിന് വേണ്ടിയാണ് വീഡിയോ ഷൂട്ട് ചെയ്തിരിക്കുന്നത്.
ഫിറ്റ്നസ് വീഡിയോകളില്‍ സഹതാരങ്ങളെ വെല്ലുവിളിച്ചുകൊണ്ടും കോഹ്‌ലി ഫിറ്റ്നസ് വീഡിയോകള്‍ പങ്കുവയ്ക്കാറുണ്ട്. രണ്ട് മണിക്കൂറിനുള്ളില്‍ 50 ലക്ഷത്തോളം ആളുകളാണ് വിരാട് കോഹ്‌ലിയുടെ ഇന്‍സ്റ്റയിലെ വീഡിയോ കണ്ടത്.
ജീവിതത്തിലെ ഏറ്റവും സുപ്രധാനമായ വിശേഷം ഇന്നലെ താരം പങ്കുവെച്ചതിന് പിന്നാലെയാണ് പുതിയ വീഡിയോ. വിരുഷ്ക താരകുടുംബത്തിലേക്ക് ഒരു അതിഥി കൂടിയെത്തുന്നു എന്നതായിരുന്നു ഇന്നലെ പുറത്തുവിട്ട വാര്‍ത്ത. ഇനി ഞങ്ങള്‍ മൂന്ന് പേര്‍ എന്ന അടിക്കുറിപ്പോടെയാണ് ഇരുവരും സന്തോഷ വിശേഷം ആരാധകരെ അറിയിച്ചിരിക്കുന്നത്.
