തിരുവനന്തപുരം: സിനിമാ ലോകം കൊറോണ വൈറസിനെ അതിജീവിക്കുമെന്ന് നടന് മോഹന്‍ലാല്‍. പിറന്നാള്‍ ദിനത്തില്‍ മാദ്ധ്യമങ്ങളോട് സംസാരിക്കവയൊണ് മോഹന്‍ലാല്‍ പ്രത്യാശ പ്രകടിപ്പിച്ചത്. അഭിനയ ജീവിതത്തിലെ 40 വര്‍ഷം കൊടുങ്കാറ്റുപോലെ കടന്നുപോയെന്നും അദ്ദേഹം പറഞ്ഞു. തന്നെ സ്‌നേഹിക്കുന്നവര്‍ക്കും തനിക്കായി പ്രാര്‍ത്ഥിക്കുന്നവര്‍ക്കും നന്ദി അറിയിക്കുന്നെന്നും മോഹന്‍ലാല്‍ പറഞ്ഞു.
മലയാളത്തിന്റെ പ്രിയ നടന് അറുപതാം പിറന്നാള്‍ ആണ് ഇന്ന്. നാല് പതിറ്റാണ്ടായി നമ്മെ അതിശയിപ്പിക്കുന്ന പ്രിയ നടന് ആശംസകള്‍ അര്‍പ്പിക്കുകയാണ് സിനിമാലോകവും ആരാധകരും അടക്കം കേരളസമൂഹം.
മോഹന്‍ലാല്‍ മലയാളത്തിന്റെ അസാമാന്യ പ്രതിഭയാണെന്ന് മുഖ്യമന്ത്രി പിണറായി വിജയന്‍ പറഞ്ഞു. നൂറ് കണക്കിന് കഥാപാത്രങ്ങളിലൂടെ പ്രേക്ഷകമനസ്സുകളില്‍ അനശ്വരമായ സ്ഥാനമാണ് അദ്ദേഹം നേടിയിട്ടുള്ളത്. വൈവിധ്യം നിറഞ്ഞതും ജീവസ്സുറ്റതുമാണ് ആ കഥാപാത്രങ്ങള്‍. ഏതുതരം കഥാപാത്രമായാലും അതില്‍ ലാലിന്റേതായ സംഭാവനയുണ്ടാകും. ഭാവം കൊണ്ടും രൂപം കൊണ്ടും ശബ്ദംകൊണ്ടും പ്രേക്ഷക മനസ്സില്‍ ആ കഥാപാത്രം നിറഞ്ഞു നില്‍ക്കും. ഈ അസാധാരണത്വമാണ് മോഹന്‍ലാലിനെ പ്രിയ നടനാക്കുന്നതെന്നും മുഖ്യമന്ത്രി കൂട്ടിച്ചേര്‍ത്തു.
