കൊച്ചി: താനൂർ ബോട്ട് അപകടത്തിൽ സ്വമേധയാ കേസെടുത്ത് കേരള ഹൈക്കോടതി. ഹൈക്കോടതിയുടെ അവധിക്കാല ബെഞ്ചാണ് സംഭവത്തിൽ സ്വമേധയാ കേസ് എടുത്തത്.
ജസ്റ്റിസ് ദേവൻ രാമചന്ദ്രൻ ഉൾപ്പെട്ട ബെഞ്ച് സ്വമേധയാ കേസെടുക്കുകയും ബന്ധപ്പെട്ട പോർട്ട് ഓഫീസറോട് റിപ്പോർട്ട് തേടുകയുമാണ് ചെയ്തത്. മാരിടൈം ബോർഡിന് കീഴിലുള്ള പോർട്ട് ഓഫീസറാണ് കോടതിക്ക് മറുപടി നൽകേണ്ടത്.
നിലവിൽ മാരിടൈം ബോർഡിന്‍റെ ആഴിക്കൽ പോർട്ട് ഓഫീസർ അപകടവുമായി ബന്ധപ്പെട്ട് ഒരു ആഭ്യന്തര അന്വേഷണം നടത്തുന്നുണ്ട്. ഈ അന്വേഷണ റിപ്പോർട്ടാവും കോടതിയിൽ സമർപ്പിക്കുക.
അതേസമയം താനൂരിലെ ദുരന്തത്തിൽ കോടതി ഞെട്ടൽ രേഖപ്പെടുത്തി. ആവർത്തിച്ചുണ്ടാകുന്ന ഇത്തരം ദുരന്തങ്ങൾക്കെതിരെ നടപടി എടുക്കാത്തതിൽ കോടതി വിമർശനം ഉന്നയിക്കുകയും ചെയ്തു.
ഈ ദുരന്തങ്ങളുടെ കാര്യകാരണങ്ങൾ കണ്ടെത്തി നടപടിയെടുക്കണമെന്നും കോടതി പറഞ്ഞു. താനൂർ ബോട്ട് ദുരന്തത്തിൽ വിശദമായ അന്വേഷണമാണ് മാരിടൈം ബോർഡ് നടത്തുന്നത്.
അപകടത്തിലായ അറ്റ്‌ലാന്‍റ എന്ന ബോട്ടിന് രജിസ്ട്രേഷൻ ഉണ്ടായിരുന്നില്ല. മത്സ്യ ബന്ധന ബോട്ട് വിനോദസഞ്ചാര ബോട്ടായി രൂപം മാറ്റിയതും അപകടത്തിനു കാരണമായി മാറിയെന്നാണ് റിപ്പോർട്ടുകൾ.
അതേസമയം ബോട്ടപകടത്തിൽ നിരവധി കുട്ടികൾ മരണപ്പെട്ട സാഹചര്യത്തിൽ ബാലവകാശ കമ്മീഷൻ ചെയർപേഴ്‌സൺ കെ വി മനോജ് കുമാർ അടിയന്തര റിപ്പോർട്ട് തേടിയിട്ടുണ്ട്.
കൃത്യമായ വിവരം രേഖപ്പെടുത്താതെയും വേണ്ടത്ര ജീവൻ സുരക്ഷാക്രമീകരണങ്ങൾ ഉറപ്പാക്കാതെയും കുട്ടികളെ ബോട്ടിൽ കയറ്റാൻ പാടില്ലെന്നും നിർദേശം നൽകി.
സംഭവം അറിഞ്ഞ ഉടൻ കമ്മീഷൻ അംഗം സി വിജയകുമാർ സ്ഥലത്തെത്തി ആവശ്യമായ നടപടി സ്വീകരിച്ചിരുന്നു.
ബോട്ടപകടത്തിൽ പിഞ്ചുകുട്ടികൾ ഉൾപ്പെടെ മരണപ്പെടാൻ ഇടയായ സംഭവം സംബന്ധിച്ച് അടിയന്തര റിപ്പോർട്ട് നൽകാൻ മലപ്പുറം ജില്ലാ കളക്ടർ, പരപ്പനങ്ങാടി , മുൻസിപ്പൽ, ജില്ല ശിശു സംരക്ഷണ ഓഫീസർ, ഡി.റ്റി.പി.സി സെക്രട്ടറി എന്നിവർക്ക് കമ്മീഷൻ നിർദേശം നൽകി.
ഇരുപത്തിരണ്ട് പേരുടെ മരണത്തിന് കാരണമായ അപകടമുണ്ടാക്കിയ ബോട്ടിന്‍റെ ഉടമ നാസറിനെ മലപ്പുറം താലൂക്ക് ആശുപത്രിയിൽ വൈദ്യപരിശോധനക്കെത്തിച്ചു.
പരിശോധനക്ക് ശേഷം ഇന്ന് ഉച്ചയോടെ ഇയാളെ പരപ്പനങ്ങാടി കോടതിയിൽ ഹാജരാക്കും. ഇന്നലെ കോഴിക്കോട്ട് നിന്നും പിടിയിലായ ഇയാളെ പോലീസ് മലപ്പുറത്തെത്തിച്ച് ചോദ്യം ചെയ്തിരുന്നു.
പ്രതിക്കെതിരെ ഇന്ന് കൂടുതൽ വകുപ്പുകൾ ചുമത്തുമെന്നാണ് റിപ്പോർട്ട്.
