തിരുവനന്തപുരം: പോത്തന്‍കോട് സ്വദേശിയെ തട്ടിക്കൊണ്ടുപോയി മര്‍ദ്ദിച്ചതായി പരാതി. പോത്തന്‍കോട് നന്നാട്ടുകാവ് സ്വദേശി നസീമിനെയാണ് തട്ടിക്കൊണ്ട് പോയി മര്‍ദ്ദിച്ചത്.
പൊട്ടക്കിണറ്റില്‍ തലകീഴായി കെട്ടിത്തൂക്കിയെന്നും നസീം പറയുന്നു. സംഭവത്തില്‍ മൂന്ന് പേര്‍ പോത്തന്‍കോട് പൊലീസിന്റെ കസ്റ്റഡിയിലാണ്.
ചൊവ്വാഴ്ച വൈകിട്ട് മൂന്ന് മണിയോട് കൂടി ഓട്ടോയിലെത്തിയ നാലംഗ സംഘം നസീമിനെ കടയില്‍ നിന്നും തട്ടിക്കൊണ്ട് പോയത്. ഓട്ടോയിലെത്തിയ സംഘം നസീമിനെ മര്‍ദ്ദിച്ച്‌ ബലമായി ഓട്ടോയില്‍ കയറ്റി വട്ടപ്പാറ കുറ്റിയാണിയിലുള്ള ഒഴിഞ്ഞ സ്ഥലത്തെത്തിച്ച്‌ ക്രൂരമായി മര്‍ദ്ദിക്കുകയായിരുന്നു.
സമീപത്തെ പൊട്ടക്കിണറ്റില്‍ നസീമിനെ തലകീഴായി കെട്ടി തൂക്കിയിട്ടു. ഇവിടെ നിന്ന് രക്ഷപ്പെട്ട നസീം ഇപ്പോള്‍ മെഡിക്കല്‍ കോളേജ് ആശുപത്രില്‍ ചികിത്സയിലാണ്. സംഭവത്തില്‍ കേസെടുത്ത് അന്വേഷണം നടത്തുകയാണെന്ന് പോത്തന്‍കോട് പൊലീസ് അറിയിച്ചു.
