കൊടുങ്ങല്ലൂര്‍ : ഫേസ്ബുക്ക് സൗഹൃദക്കെണിയില്‍ കുരുങ്ങിയ വിദ്യാര്‍ത്ഥിനിയുമായി കാറില്‍ ഊര് ചുറ്റിയ യുവാവിനെ പൊലീസ് പൊക്കി.
കൊണ്ടോട്ടി സിയാംകണ്ടം സ്വദേശി അമീറിനെയാണ് (23) അറസ്റ്റ് ചെയ്തത്. ഹയര്‍ സെക്കന്‍ഡറിയില്‍ പഠിക്കുന്ന വിദ്യാര്‍ത്ഥിനി രാവിലെ വീട്ടില്‍ നിന്ന് സ്‌കൂളിലേക്ക് പോന്ന ശേഷം ഫേസ്ബുക്ക് സുഹൃത്തിനൊപ്പം കറങ്ങുകയായിരുന്നു. വീട്ടുകാര്‍ നല്‍കിയ പരാതിയുടെ അടിസ്ഥാനത്തില്‍ അന്വേഷണം നടത്തി, ഇരുവരും ഇരിങ്ങാലക്കുടയില്‍ ഉണ്ടെന്ന് വിവരം കിട്ടി. തുടര്‍ന്ന് തന്ത്രപൂര്‍വ്വം വിളിച്ചു വരുത്തി നടപടിയെടുക്കുകയായിരുന്നു. യുവാവിന്റെ കാറും പൊലീസ് കസ്റ്റഡിയിലെടുത്തു. കൊടുങ്ങല്ലൂരിലും പരിസരങ്ങളിലും സമാനരീതിയിലുള്ള, ചുറ്റിത്തിരിയലുകള്‍ ശ്രദ്ധയില്‍വന്നിട്ടുണ്ടെന്നും അതെല്ലാം പൊലീസ് നിരീക്ഷിച്ചുവരികയാണെന്നും എസ്.ഐ കെ.എസ്.സൂരജ് പറഞ്ഞു.
