തിരുവനന്തപുരം: സ്കൂളുകളിലും അംഗന്‍വാടികളിലും ഇനി മുതല്‍ കുട്ടികള്‍ക്ക് ഫോര്‍ട്ടിഫൈഡ് അരി വിതരണം ചെയ്യും.
കുട്ടികളിലെ പോഷകാഹാരക്കുറവ് പരിഹരിക്കുന്നതിനായാണ് പോഷകഗുണങ്ങള്‍ വര്‍ധിപ്പിച്ച അരി വിതരണം ചെയ്യുന്നത്. കേന്ദ്ര സര്‍ക്കാരിന്റെ നിര്‍ദ്ദേശപ്രകാരം സംസ്ഥാനത്ത് ഫോര്‍ട്ടിഫൈഡ് അരി വിതരണം എഫ്.സി.ഐ ആരംഭിച്ചു.
ഇത് കൂടാതെ ജനുവരി മുതല്‍ വയനാട് ജില്ലയിലെ കാര്‍ഡുടമകള്‍ക്കും ഫോര്‍ട്ടിഫൈഡ് അരിയാകും റേഷന്‍ കടകള്‍ വഴി ലഭിക്കുകയെന്നും എഫ്.സി.ഐ അറിയിച്ചു. 2024 ഓടെ എല്ലാ സംസ്ഥാനങ്ങളിലും പൊതുവിതരണ സമ്ബ്രദായത്തിലൂടെ വിവിധ പദ്ധതികള്‍ വഴി പോഷക ഗുണങ്ങള്‍ വര്‍ധിപ്പിച്ച അരി നല്‍കാനാണ് കേന്ദ്ര തീരുമാനം. ദേശീയ ആരോഗ്യ സര്‍വേയില്‍ ഗര്‍ഭിണികളിലും മുലയൂട്ടുന്ന അമ്മമാരിലും ഇരുമ്ബ്, ഫോളിക് ആസിഡ്, വിറ്റാമിന്‍ ബി 12 എന്നിവയുടെ കുറവ് കണ്ടെത്തിയിരുന്നു. തുടര്‍ന്നാണ് ഇവ ചേര്‍ത്ത് പോഷകസമൃദ്ധമാക്കിയ അരി വിതരണം ചെയ്യാന്‍ കേന്ദ്ര സര്‍ക്കാര്‍ പദ്ധതി തയാറാക്കിയത്. ആഗോള പട്ടിണി സൂചികയില്‍ 107 രാജ്യങ്ങളില്‍ 94ാം സ്ഥാനത്താണ് ഇന്ത്യ.
ജനസംഖ്യയുടെ മൂന്നില്‍ രണ്ടു ഭാഗവും കഴിക്കുന്ന ഇന്ത്യയിലെ പ്രധാന ഭക്ഷണങ്ങളിലൊന്നാണ് അരി. അരി സൂക്ഷ്മ പോഷകങ്ങള്‍ ഉപയോഗിച്ച്‌ ഫോര്‍ട്ടിഫൈ ചെയ്യുന്നത് ദരിദ്ര വിഭാഗങ്ങളിലെ പോഷകാഹാരക്കുറവ് പരിഹരിക്കാന്‍ മികച്ച മാര്‍ഗമായാണ് കേന്ദ്ര ഭക്ഷ്യമന്ത്രാലയം വിലയിരുത്തുന്നത്. കേന്ദ്ര സര്‍ക്കാറിെന്‍റ വെല്‍ഫെയര്‍ സ്‌കീമുകളിലുള്ള അലോട്ട്മെന്‍റ് മുഖാന്തരമാണ് അരി സംസ്ഥാനങ്ങള്‍ക്ക് നല്‍കുക.
നേരത്തേ കേന്ദ്രസര്‍ക്കാര്‍ നിര്‍ദേശപ്രകാരം സംസ്ഥാന സര്‍ക്കാര്‍ തയാറാക്കിയ ഫോര്‍ട്ടിഫൈഡ് അരിയില്‍ ഇരുമ്ബിന്റെ അംശം കൂടുതലായതിനാല്‍ ഭക്ഷ്യയോഗ്യമല്ലെന്ന് ഫുഡ് സേഫ്‌റ്റി ആന്‍ഡ് സ്റ്റാന്‍ഡേര്‍ഡ് അതോറിറ്റി കണ്ടെത്തിയിരുന്നു. മൈസൂരു സെന്‍റര്‍ ഫോര്‍ ഫുഡ് ടെക്നോളജിയുടെ പരിശോധനയിലും സാമ്ബിളുകള്‍ പരാജയപ്പെട്ടതോടെ 300 ടണ്‍ അരിയാണ് ഭക്ഷ്യയോഗ്യമല്ലാതെ മില്ലുകളില്‍ കെട്ടിക്കിടക്കുന്നത്. തുടര്‍ന്ന്, പുതിയ രീതിയില്‍ ഫോര്‍ട്ടിഫിക്കേഷന്‍ നടത്തി കേന്ദ്രത്തിന്റെ അംഗീകാരത്തിനായി അയച്ചിരിക്കുകയാണ്.
അരിയില്‍ അടങ്ങിയിരിക്കുന്ന പോഷകങ്ങള്‍
ഒരു കിലോ ഫോര്‍ട്ടിഫൈഡ് അരിയില്‍ അടങ്ങിയിരിക്കുന്ന പോഷകങ്ങള്‍. ഇരുമ്ബ് (28 മി. ഗ്രാം- 42.5 മി. ഗ്രാം), ഫോളിക് ആസിഡ് (75-125 മൈക്രോഗ്രാം), വിറ്റമിന്‍ ബി -12 (0.75-1.25 മൈക്രോഗ്രാം), സിങ്ക് (10 മി.ഗ്രാം- 15 മി.ഗ്രാം), വിറ്റമിന്‍ എ (500-750 മൈക്രോഗ്രാം ആര്‍ഇ), വിറ്റമിന്‍ ബി -1 (1 മി.ഗ്രാം- 1.5 മി.ഗ്രാം), വിറ്റമിന്‍ ബി -2 (1.25 മി.ഗ്രാം- 1.75 മി.ഗ്രാം)
പാചകം ചെയ്യേണ്ട രീതി
ഫോര്‍ട്ടിഫൈഡ് അരി പാചകം ചെയ്യുന്നതിന് പ്രത്യേക രീതി ആവശ്യമില്ല. പാചകം ചെയ്യുന്നതിനുമുമ്ബ് അരി വൃത്തിയാക്കി സാധാരണ രീതിയില്‍ കഴുകേണ്ടതുണ്ട്. പാചകം ചെയ്തതിനുശേഷവും ഫോര്‍ട്ടിഫൈഡ് അരി പാചകം ചെയ്യുന്നതിനുമുമ്ബുണ്ടായിരുന്ന അതേ ഗുണങ്ങളും സൂക്ഷ്മ പോഷക നിലവാരവും നിലനിര്‍ത്തും.