മംഗലപുരം: ദേശീയപാതയില്‍ കോരാണി കാരിക്കുഴിയില്‍ നിയന്ത്രണംവിട്ട പോലീസ് ജീപ്പ് കാറിലിടിച്ച്‌ നിയമവിദ്യാര്‍ഥിനിക്ക് ദാരുണാന്ത്യം. കൊല്ലം ആശ്രാമം ലക്ഷ്മണനഗര്‍ 88 ജമീലാമന്‍സിലില്‍ സജീദ്-രാജി ദമ്ബതിമാരുടെ മകള്‍ അനൈന(22)യാണ് മരിച്ചത്. കാറിലുണ്ടായിരുന്ന സഹോദരനും മാതാപിതാക്കള്‍ക്കും പരിക്കേറ്റു. വിവാഹാലോചനയുമായി ബന്ധപ്പെട്ട് കൊല്ലത്തേക്കു പോകുകയായിരുന്നു കുടുംബം.അപകടത്തി‍ല്‍ പരിക്കേറ്റ പോലീസ് ഡ്രൈവര്‍ അഹമ്മദിനെ ആറ്റിങ്ങല്‍ താലൂക്ക് ആശുപത്രിയിലും എ.എസ്.ഐ. ഷജീറിനെ ചിറയിന്‍കീഴ് ജില്ലാ ആശുപത്രിയിലും പ്രവേശിപ്പിച്ചു.വ്യാഴാഴ്ച രാവിലെ പതിനൊന്നരയോടെയായിരുന്നു അപകടം. തിരുവനന്തപുരത്തേക്കു പോകുകയായിരുന്ന ചിറയിന്‍കീഴ് പോലീസ് സ്റ്റേഷനിലെ ജീപ്പ് നിയന്ത്രണംവിട്ട് കാറില്‍ ഇടിക്കുകയായിരുന്നു. കാരിക്കുഴി ഭാഗത്ത് റോഡിനു വശത്ത് ഇന്റര്‍ലോക്ക് പാകാനായി എടുത്ത കുഴിയില്‍ വീണാണ് ജീപ്പ് നിയന്ത്രണംവിട്ടത്.
കോരാണിയില്‍ പോലീസ് ജീപ്പ് കാറിലിടിച്ച്‌ നിയമവിദ്യാര്‍ത്ഥിനിക്ക് ദാരുണാന്ത്യം
