തിരുവനന്തപുരം: വര്‍ഷങ്ങളുടെ ഇടവേളയ്ക്കു ശേഷം എം.ജി. ശ്രീകുമാര്‍ തറവാട് വീടായ തൈക്കാട് മേടയില്‍ വീട്ടിലെത്തി. ജ്യേഷ്ഠ പത്നി പദ്മജാ രാധാകൃഷ്ണന്റെ വിയോഗമറിഞ്ഞെത്തിയ എം.ജി. ശ്രീകുമാര്‍ സഹോദരി ഓമനക്കുട്ടിയുമായി ഏറെ നേരം സംസാരിച്ചശേഷമാണ് മടങ്ങിയത്. കുടുംബവുമായുള്ള അഭിപ്രായ വ്യത്യാസത്തെ തുടര്‍ന്ന് വീട് മാറിയ ശ്രീകുമാര്‍ പിന്നെ അവിടെ വന്നിട്ടില്ല. സഹോദരന്‍ എം.ജി. രാധാകൃഷ്ണന്‍ മരിച്ചപ്പോള്‍ ശ്രീകുമാര്‍ അമേരിക്കയിലായിരുന്നു. പദ്മജാ രാധാകൃഷ്ണന്റെ ഓര്‍മ്മകള്‍ പങ്കിട്ട് എം.ജി. ശ്രീകുമാര്‍ ഫേസ് ബുക്കില്‍ കുറിച്ചതിങ്ങനെ: എന്റെ ചേട്ടന്‍ കല്യാണം കഴിക്കുമ്ബോള്‍ തുടങ്ങിയുള്ള എത്രയോ ഓര്‍മകള്‍. പത്മജ ചേച്ചി ഒരു നല്ല കലാകാരി, നര്‍ത്തകി. നിരവധി മേഖലകളില്‍ പ്രവര്‍ത്തിച്ചു. പത്മജ ചേച്ചി എഴുതി ചേട്ടന്‍ ഈണം നല്‍കിയ ഒരുപാട് ഹിറ്റ് ഗാനങ്ങള്‍ ആകാശവാണിയിലുണ്ട്. ചേച്ചി പെട്ടെന്ന് നമ്മെയെല്ലാം വിട്ടു പോയത് വളരെ നിര്‍ഭാഗ്യകരമായിപ്പോയി. ചേച്ചിയുടെ ആത്മാവിനു നിത്യശാന്തി ലഭിക്കട്ടെ’.
ജ്യേഷ്ഠ പത്നിയുടെ വിയോഗമറിഞ്ഞ്, വര്‍ഷങ്ങളുടെ ഇടവേളയ്ക്കു ശേഷം എം.ജി. ശ്രീകുമാര്‍ തറവാട് വീട്ടിലെത്തി
