നിയമസഭാ സ്പീക്കറെ ‘നിങ്ങൾ’ എന്ന് വിളിച്ച് എ.എൻ ഷംസീർ എം.എൽ.എ. ഇന്നലെ സാംക്രമികരോഗങ്ങൾ സംബന്ധിച്ച ബില്ലിന്റെ ചർച്ചക്കിടെയായിരുന്നു സംഭവം. നിങ്ങൾ എന്ന് സ്പീക്കറെ വിളിച്ചത് തെറ്റായെന്ന് പ്രതിപക്ഷം ചൂണ്ടിക്കാട്ടിയപ്പോൾ ഷംസീർ ഖേദം പ്രകടിപ്പിച്ചു.
ചർച്ചയിൽ സമയക്രമമില്ലങ്കിലും അംഗങ്ങൾ 10 മിനിറ്റിൽ പ്രസംഗം അവസാനിപ്പിക്കണമെന്ന് സ്പീക്കർ എം.ബി. രാജേഷ് നിർദേശിച്ചിരുന്നു. നിരാകരണ പ്രമേയം അവതരിപ്പിച്ച് സംസാരിച്ച കുറുക്കോളി മൊയ്തീൻ
സമയപരിധിക്കുള്ളിൽ നിന്ന് സംസാരിച്ചു. പിന്നീട്, സംസാരിച്ച എൻ.എ. നെല്ലിക്കുന്ന്, പി.സി. വിഷ്ണുനാഥ് എന്നിവരെല്ലാം വളരെക്കൂടുതൽ സമയമെടുത്താണ് സംസാരിച്ചത്. ഈ അവസരത്തിൽ സ്പീക്കർ ചെയറിലില്ലായിരുന്നു. സ്പീക്കർ മടങ്ങിയെത്തിയപ്പോൾ ഷംസീർ സംസാരിക്കുകയായിരുന്നു. പ്രസംഗം ചുരുക്കാൻ സ്പീക്കർ ആവശ്യപ്പെട്ടപ്പോഴാണ് ‘നിങ്ങൾ പ്രതിപക്ഷത്തിന് കൂടുതൽ സമയം സംസാരിക്കാൻ അവസരം നൽകിയില്ലേ’യെന്നാണ് ഷംസീർ ചോദിച്ചത്.
ഷംസീറിന്റെ പരാമർശത്തെ തുടർന്ന് പ്രതിപക്ഷാംഗങ്ങൾ ബഹളംവെച്ചു. പത്ത് വർഷത്തോളം ലോക്സഭാംഗമായിരുന്ന വ്യക്തിയാണ് സ്പീക്കറെന്നും അദ്ദേഹത്തെ നിങ്ങളെന്ന് വിളിച്ചത് ചട്ടലംഘനവും സഭയോടുള്ള അവഹേളനവുമാണെന്നും പി.ടി. തോമസ് എം.എൽ.എ ചൂണ്ടിക്കാട്ടി. എന്നാൽ, ‘നിങ്ങൾ’ എന്നത് തലശ്ശേരിയിലെ സംഭാഷണ ശൈലിയാണെന്നും തെറ്റായി പറഞ്ഞിട്ടുണ്ടെങ്കിൽ ഖേദം പ്രകടിപ്പിച്ച് പരാമർശം പിൻവലിക്കുകയാണെന്നും ഷംസീർ പറഞ്ഞു.
