ന്യൂഡല്‍ഹി> സ്വയംപര്യാപ്തതയാണ് കോവിഡ് രാജ്യത്തെ പഠിപ്പിച്ച വലിയ പാഠമെന്ന് പ്രധാനമന്ത്രി നരേന്ദ്ര മോഡി. മുന്‍പൊരിക്കലും ഇങ്ങനെയൊരു സാഹചര്യത്തെ പറ്റി നാം ചിന്തിച്ചിട്ടില്ല. ആരെയും ആശ്രയിക്കാതെ ദൈനംദിന കാര്യങ്ങള്‍ നിര്‍വഹിക്കാന്‍ നാം പ്രാപ്തരായെന്നും മോദി വ്യക്തമാക്കി. ഗ്രാമമുഖ്യന്‍മാരുമായി നടത്തിയ വീഡിയോ കോണ്‍ഫറന്‍സിലാണ് പ്രധാനമന്ത്രിയുടെ പരാമര്‍ശം.
നഗരങ്ങളേക്കാള്‍ മികച്ച രീതിയില്‍ കോവിഡിനെ പ്രതിരോധിക്കാന്‍ ഗ്രാമങ്ങള്‍ക്ക് കഴിഞ്ഞുവെന്നും പ്രധാനമന്ത്രി പറഞ്ഞു. കോവിഡ് വലിയ വെല്ലുവിളിയാണ് ഉയര്‍ത്തിയത്. നാം അതില്‍ നിന്ന് പഠിക്കണം. കോവിഡില്‍ നിന്ന് മോചനം നേടാന്‍ നാം മറ്റാരെയും ആശ്രയിച്ചിട്ടില്ല. നഗരങ്ങള്‍ കോവിഡ് പ്രതിരോധത്തില്‍ ഗ്രാമങ്ങളെ മാതൃകയായക്കണം. ജില്ലകളും സംസ്ഥാനങ്ങഴും രാജ്യമാകെയും സ്വയം പര്യാപ്തമാകണം .
കഴിഞ്ഞയാഴ്ച ഗ്രാമവികസന മന്ത്രി നരേന്ദ്ര സിങ് തോമറിന് അയച്ച കത്തില്‍ രാജ്യത്തെ പഞ്ചായത്ത് രാജ് അംഗങ്ങള്‍ കോവിഡിനെ പ്രതിരോധിക്കുന്നതില്‍ വലിയ പങ്കുവഹിച്ചുവെന്ന് അദ്ദേഹം പറഞ്ഞിരുന്നു. കരുത്തരായ പോരാളികള്‍ എന്നാണ് പ്രധാനമന്ത്രി അവരെ വിളിച്ചത്.
