ചെറുപുഴ: നിര്‍ത്തിയിട്ട സ്വകാര്യബസില്‍ യുവതിക്കു നേരെ നഗ്നതാപ്രദര്‍ശനം നടത്തിയ സംഭവത്തില്‍ പ്രതി അറസ്റ്റില്‍. പ്രതി ചിറ്റാരിക്കാല്‍ നല്ലോമ്പുഴ കല്ലങ്കോട് സ്വദേശി ബിനു നിരപ്പേലിനെ(45)യാണ് ചെറുപുഴ പോലിസ് അറസ്റ്റു ചെയ്തത്.
ഇന്നു പലര്‍ച്ചെയോടെ ചെറുപുഴയ്ക്കു സമീപത്തു നിന്നാണ് പ്രതിയെ പിടികൂടിയത്.ചെറുപുഴ ബസ് സ്റ്റാൻഡില്‍ ഇക്കഴിഞ്ഞ ഞായര്‍ ഉച്ചയ്ക്കാണ് ഇയാള്‍ യുവതിക്കു നേരത്തെ നഗ്നതാ പ്രദര്‍ശനം നടത്തിയത്.
ചെറുപുഴ- -തളിപ്പറമ്പ് റൂട്ടിലോടുന്ന സ്വകാര്യ ബസ്സില്‍ യുവതി ഇരുന്നതിനു എതിര്‍വശത്തെ സീറ്റില്‍വന്നിരുന്ന ഇയാള്‍ നഗ്നതാ പ്രദര്‍ശനം നടത്തുകയും അവരെ നോക്കി സ്വയംഭോഗം ചെയ്യുകയുമായിരുന്നു.
സംഭവത്തിന്‍റെ ദൃശ്യങ്ങള്‍ യുവതി തന്നെ മൊബൈല്‍ ഫോണില്‍ പകര്‍ത്തി സമൂഹ മാധ്യമങ്ങളില്‍ പങ്കുവച്ചിരുന്നു. ഈ ദൃശ്യങ്ങളില്‍ നിന്ന് പ്രതിയെ തിരിച്ചറിഞ്ഞെങ്കിലും ഇയാള്‍ ഒളിവില്‍ പോയിരുന്നു.
പ്രതിയെ പിടികൂടാന്‍ ഇരയായ യുവതിയുടെ മൊഴി തലശേരിയിലെത്തി ചെറുപുഴ പോലിസ് രേഖപ്പെടുത്തിയ ശേഷമാണ് കേസ് രജിസ്റ്റര്‍ ചെയ്തത്.
കേസെടുത്ത ചെറുപുഴ പോലിസ് എസ് ഐ എം പി ഷാജിയുടെ നേതൃത്വത്തില്‍ പ്രതിക്കായി തെരച്ചില്‍ നടത്തി വരികയായിരുന്നു. നിരീക്ഷണ ക്യാമറ ദൃശ്യത്തില്‍ നിന്നും പോലിസ് ചിറ്റാരിക്കാല്‍ സ്വദേശിയാണെന്ന് തിരിച്ചറിഞ്ഞിരുന്നു.
തളിപ്പറമ്പ് ആലക്കോട് വഴി ചെറുപുഴയില്‍ എത്തുന്ന സ്വകാര്യ ബസില്‍ ഉച്ചക്ക് രണ്ട് മണിയോടെയാണ് ചെറുപുഴയില്‍ ആതുര രംഗത്ത് ജോലിയെടുക്കുന്ന യുവതി അപമാനിതയായത്.
ഞായറാഴ്ച കാരണം ബസില്‍ യാത്രക്കാര്‍ കുറവായിരുന്നു. ഇതിനിടെയാണ് യുവതിയെ നോക്കി ഇയാള്‍ സ്വയംഭോഗം ചെയ്യുന്ന രീതിയില്‍ നഗ്നതാപ്രദര്‍ശനം നടത്തി അപമാനിച്ചത്.
പോലീസില്‍ പരാതി നല്‍കാന്‍ നില്‍ക്കാതെ യുവതി ദൃശ്യങ്ങള്‍ സോഷ്യല്‍ മീഡിയ വഴി പ്രചരിപ്പിച്ചതോടെയാണ് സംഭവം പുറം ലോകമറിഞ്ഞത്.
പ്രതിയെ ഉടന്‍ അറസ്റ്റ് രേഖപ്പെടുത്തി കോടതിയില്‍ ഹാജരാക്കും.
