ഇന്ത്യയില്‍ രാഷ്‌ട്രീയക്കളികള്‍ ഏറ്റവും നന്നായി അറിയാവുന്ന രണ്ടു നേതാക്കള്‍ പ്രധാനമന്ത്രി നരേന്ദ്ര മോദിയും അദ്ദേഹത്തിന്റെ വലംകൈയും കേന്ദ്ര ആഭ്യന്തരമന്ത്രിയുമായ അമിത്ഷായും ആണ്. പക്ഷേ ഇവര്‍ക്ക് ഇനിയും തീരെ പിടികിട്ടാത്തതാണ് പഞ്ചാബിലെ അകാലി രാഷ്‌ട്രീയം. പഞ്ചാബിലെ റാലികളില്‍ ഇരുവരും സിക്കുകാരുടെ തലപ്പാവ് വരെ ധരിച്ചു. കാവി നിറമായിരുന്നെന്നു മാത്രം. പക്ഷേ സിക്കുകാര്‍ വീണില്ല!
കഴിഞ്ഞ മൂന്നു തിരഞ്ഞെടുപ്പുകളില്‍ (2014, 2019 ലോക്‌സഭാ തിരഞ്ഞെടുപ്പുകളും 2017ലെ നിയമസഭാ തിരഞ്ഞെടുപ്പും) ശിരോമണി അകാലി ദള്‍ സഖ്യകക്ഷിയായിരുന്നിട്ടും ബി.ജെ.പിക്ക് നേട്ടമുണ്ടായില്ല. ഉത്തരേന്ത്യയില്‍ ബി.ജെ.പിയെയും മോദി തരംഗത്തെയും ചെറുത്തുനിന്ന ഏക സംസ്ഥാനം പഞ്ചാബാണ്. ബി.ജെ.പിയുടെ ഹിന്ദു വോട്ട് ബാങ്കും അകാലികളുടെ ജാട്ട്, സിക്ക് വോട്ട് ബാങ്കും പരസ്‌പരം സഹകരിച്ചില്ലെന്നാണ് തിരഞ്ഞെടുപ്പ് വിദഗ്ദ്ധര്‍ കണ്ടെത്തിയത്.
അകാലികള്‍ വോട്ട് ചെയ്യാത്തതുകൊണ്ടാണ് അമൃത്‌സറില്‍ 2014ല്‍ അരുണ്‍ ജയ്‌റ്റ്‌ലിയും 2019ല്‍ ഹര്‍ദീപ് സിംഗ് പുരിയും തോറ്റത്. 2017 അസംബ്ലി തിരഞ്ഞെടുപ്പിലും ഇതുതന്നെ സംഭവിച്ചു. എന്നിട്ടും ബി.ജെ.പിക്ക് അകാലി രാഷ്‌ട്രീയം പിടികിട്ടാത്തതിന്റെ ഫലമാണ് അകാലിദളിന് കാര്‍ഷിക നിയമങ്ങളുടെ പേരില്‍ എന്‍.ഡി.എ വിടേണ്ടിവന്നത്. തങ്ങളുടെ മന്ത്രി ഹര്‍സിമ്രത് കൗര്‍ ബാദലിനെ അകാലിദാള്‍ പിന്‍വലിച്ചെങ്കിലും പാര്‍ട്ടിയുടെ വോട്ട് ബാങ്കായ കര്‍ഷകര്‍ തൃപ്തിപ്പെട്ടില്ല.
സംസ്ഥാന മുന്നണിയില്‍ ജൂനിയര്‍ പങ്കാളിയായി ഒതുങ്ങിനിന്ന ബി.ജെ.പി കേന്ദ്രത്തില്‍ മാടമ്ബി മനോഭാവം കാട്ടി. ഹര്‍സിമ്രത് കൗറിനെ ഭക്ഷ്യ സംസ്‌കരണ വകുപ്പിലൊതുക്കിയ ബി.ജെ.പി അകാലികളുടെ പല ആവശ്യങ്ങളും കേട്ടില്ലെന്നു നടിച്ചു. കാര്‍ഷിക നിയമങ്ങളോട് പഞ്ചാബില്‍ ഇത്രയും രോഷമുണ്ടാകാന്‍ കാരണങ്ങള്‍ പലതാണ്. പഞ്ചാബി ജനതയുടെ സിക്ക് വീര്യവും ആത്മാഭിമാനവുമാണ് പ്രധാനം.
കര്‍ഷക ഭൂരിപക്ഷമുള്ള സിക്കുകാരെ മോദി സര്‍ക്കാര്‍ ഒരിക്കലും വിശ്വാസത്തിലെടുത്തില്ല. മോദി രഥത്തിന്റെ വര്‍ഗീയചക്രമായ ഹൈന്ദവ ധ്രുവീകരണം പഞ്ചാബില്‍ ഏശിയില്ല. ബി.ജെ.പിയുടെ ഹൈന്ദവ ധ്രുവീകരണമെന്നാല്‍ ഹിന്ദു- മുസ്ളിം വേര്‍തിരിവെന്നാണ് അര്‍ത്ഥം. പഞ്ചാബില്‍ അതിനു പ്രസക്തിയില്ല.
പഞ്ചാബിലെ സിക്ക് ജനതയെ ഹിന്ദുക്കളായാണ് ആര്‍.എസ്.എസും ബി.ജെ.പിയും കണ്ടത്. മുന്‍ സര്‍സംഘചാലക് ബാലാസാഹെബ് ദേവറസിന്റെ പ്രസിദ്ധമായ ഒരു പ്രസ്താവനയുണ്ട് - സിക്കുകാരെല്ലാം കേശധാരികളായ (മുടി വളര്‍ത്തിയ) ഹിന്ദുക്കളാണെന്ന്. സിക്ക് വീര്യത്തിന്റെ പിതൃത്വം അവകാശപ്പെട്ട കൊടിയ ഭീകരന്‍ ഭിന്ദ്രന്‍ വാല അതിനെ നിശിതമായി പരിഹസിച്ചത് ഇങ്ങനെ: ’അപ്പോള്‍ മുസ്ളിങ്ങള്‍ ’സുന്നത്ത് ധാരി”കളായ ഹിന്ദുക്കളാണെന്നും ദേവറസ് പറയുമോ?’ പഞ്ചാബിലെ മുസ്ളിം ന്യൂനപക്ഷം പത്താമത്തെ ഗുരുവായ ഗുരു ഗോബിന്ദ് സിംഗിന്റെ കാലം മുതല്‍ സിക്കുകാരുടെ ആദരവും സംരക്ഷണവും അനുഭവിക്കുന്നവരാണ്. ഗുരുവിന്റെ പുത്രന്മാരെ ഔറംഗസേബില്‍ നിന്ന് രക്ഷിച്ചതിന്റെ നന്ദിയാണത്. അപ്പോള്‍ ഹിന്ദു- മുസ്ളിം ധ്രുവീകരണത്തിനുള്ള സാദ്ധ്യത തന്നെ ഇല്ലാതായി.
ഹിന്ദുക്കളും സിക്കുകാരും വിരലും നഖവും പോലെ ഒരു ശരീരത്തിന്റെ ഭാഗമാണെന്നൊക്കെ ഒരു ചൊല്ലുണ്ട്. പക്ഷേ സിക്കുകാര്‍ ഒരിക്കലും ഹിന്ദുക്കളല്ല. അവരെ ഹിന്ദുത്വവാദം ഏശുകപോലുമില്ല. അത് അവരെ സ്വാധീനിച്ചിരുന്നെങ്കില്‍ സര്‍വ പ്രതാപങ്ങളോടെ മൂന്നു തിരഞ്ഞെടുപ്പുകളെ നേരിട്ട മോദിയെ പഞ്ചാബ് തള്ളിക്കളയില്ലായിരുന്നു.
