മുംബൈ: നടി ഭാര്‍തി സിംഗിന്റെ വസതിയില്‍ നാര്‍ക്കോട്ടിക്‌സ് കണ്‍ട്രോള്‍ ബ്യൂറോയുടെ റെയ്ഡ്. ഭാര്‍തിയും ഭര്‍ത്താവ് ഹര്‍ഷ് ലിംബാച്ചിയായും ലഹരി മരുന്ന് ഉപയോഗിക്കുന്നുവെന്ന വിവരം ലഭിച്ചതിനെ തുടര്‍ന്നാണ് എന്‍സിബിയുടെ റെയ്ഡ്.
ബോളിവുഡിലെ ലഹരി മരുന്ന് ഇടപാടുകളെ കുറിച്ച്‌ എന്‍സിബിയുടെ അന്വേഷണം പുരോഗമിക്കുന്നതിനിടെയാണ് ഭാര്‍തി സിംഗിന്റെ വീട്ടില്‍ പരിശോധന നടത്തിയത്. ബോളിവുഡ് താരം സുശാന്ത് സിംഗ് രാജ്പുത്തിന്റെ മരണവുമായി ബന്ധപ്പെട്ടാണ് താരങ്ങള്‍ക്കിടയിലെ ലഹരി മരുന്ന് ഉപയോഗത്തെ കുറിച്ചുള്ള വിവരങ്ങള്‍ പുറത്തു വരുന്നത്.
പല പ്രമുഖ താരങ്ങള്‍ക്കും ലഹരി മരുന്ന് ഇടപാടുമായി ബന്ധമുണ്ടെന്നാണ് എന്‍സിബി കണ്ടെത്തിയിരിക്കുന്നത്. അന്വേഷണത്തിന്റെ ഭാഗമായി സിനിമാ പ്രവര്‍ത്തകരുടെ വീടുകളിലും ഓഫീസുകളിലും വ്യാപക റെയ്ഡ് തുടരുകയാണ്. കഴിഞ്ഞ ദിവസം നിര്‍മ്മാതാവ് ഫിറോസ് നദിയാ വാലയുടെ വീട്ടില്‍ എന്‍സിബി റെയ്ഡ് നടത്തിയിരുന്നു. തുടര്‍ന്ന് അദ്ദേഹത്തിന്റെ ഭാര്യ ഷബാനാ സെയ്ദിനെ അറസ്റ്റ് ചെയ്യുകയും ചെയ്തിരുന്നു.
