ന്യൂയോര്‍ക്ക്: അമേരിക്കയിലെ ഒന്നാം നിര ഇന്ധന പൈപ്പ്ലൈന്‍ ഓപ്പറേറ്ററായ കൊളോണിയല്‍ പൈപ്പ്ലൈന്‍ കമ്ബനിക്ക് നേരെ സൈബര്‍ ആക്രമണം. ഇതേ തുടര്‍ന്ന് കമ്ബനിയുടെ മുഴുവന്‍ പൈപ്പ് ലൈന്‍ ശൃംഖലകളും അടച്ചു.
വെള്ളിയാഴ്ചയാണ് കമ്ബനിക്ക് നേരെ ആക്രമണം ഉണ്ടായത്. തുടര്‍ന്ന് കമ്ബനിയുടെ സംവിധാനങ്ങള്‍ ഓഫ്ലൈനാക്കി നിര്‍ത്തിവെച്ചു. ഇതിന് പുറമെ ആക്രമണം ഐ.ടി സംവിധാനങ്ങളെയും ബാധിച്ചിട്ടുണ്ട്. ഇതുസംബന്ധിച്ച്‌ അന്വേഷണം നടത്താന്‍ സ്വകാര്യ സൈബര്‍ സുരക്ഷ സ്ഥാപനത്തെ കമ്ബനി ചുമതലപ്പെടുത്തി. കൂടാതെ മറ്റു സര്‍ക്കാര്‍ ഏജന്‍സികളെയും ബന്ധപ്പെട്ടിട്ടുണ്ട്.
അതെ സമയം വെള്ളിയാഴ്ച രാത്രി ന്യൂയോര്‍ക്ക് മെര്‍ക്കന്‍റല്‍ എക്സ്ചേഞ്ചില്‍ പെട്രോള്‍, ഡീസല്‍ വില വര്‍ധിച്ചതായും റിപ്പോര്‍ട്ടുണ്ട് . പെട്രോളിന് 0.6 ശതമാനം ഉയര്‍ന്ന് ഒരു ഗ്യാലന് 2.1269 ഡോളറിലെത്തി. ഡീസലിന് 1.1 ശതമാനം ഉയര്‍ന്ന് 2.0106 ഡോളറിലെത്തി. പൈപ്പ്ലൈനുകള്‍ എത്രകാലം അടച്ചിടും എന്നതിന് അനുസരിച്ച്‌ വിലയില്‍ ഇനിയും മാറ്റം വന്നേക്കാം .
യുഎസിലെ ഗള്‍ഫ് തീരത്തെ റിഫൈനറുകളില്‍ നിന്ന് കിഴക്കന്‍, തെക്കന്‍ അമേരിക്കയിലേക്ക് ഇന്ധനം കൊണ്ടുപോകുന്ന കമ്ബനിയാണ് കൊളോണിയല്‍. 8,850 കിലോമീറ്റര്‍ ദൈര്‍ഘ്യം വരുന്ന പൈപ്പ്ലൈനുകളിലൂടെ കമ്ബനി പ്രതിദിനം 2.5 ദശലക്ഷം ബാരല്‍ പെട്രോള്‍, ഡീസല്‍, ജെറ്റ് ഫ്യുവല്‍, മറ്റ് ശുദ്ധീകരിച്ച ഉല്‍പ്പന്നങ്ങള്‍ എന്നിവ കൊണ്ടുപോകുന്നുണ്ട്.
അതേസമയം, എത്രകാലം തങ്ങളുടെ പൈപ്പ് ലൈനുകള്‍ അടച്ചിടുമെന്ന് കമ്ബനി അധികൃതര്‍ വ്യക്തമാക്കിയിട്ടില്ല. അമേരിക്കയുടെ കിഴക്കന്‍ തീരത്തുനിന്നുള്ള ഇന്ധന വിതരണത്തിന്റെ 45 ശതമാനവും നിര്‍വഹിക്കുന്നത് കൊളോണിയല്‍ പൈപ്പ്ലൈന്‍ ആണ്. അതെ സമയം 2017ല്‍ ഗള്‍ഫ് തീരത്ത് വീശിയടിച്ച ഹാര്‍വി ചുഴലിക്കാറ്റിനെ തുടര്‍ന്നും കൊളോണിയല്‍ തങ്ങളുടെ പൈപ്പ്ലൈനുകള്‍ അടച്ചിരുന്നു.
