മുംബൈ: ബോളിവുഡ് നടന്‍ അര്‍ജുന്‍ രാംപാലിന്റെ വീട്ടില്‍ നര്‍ക്കോട്ടിക് കണ്‍ട്രോള്‍ ബ്യൂറോയുടെ റെയ്ഡ്. മുംബൈയിലെ അന്ധേരിയില്‍ ഉള്ള താരത്തിന്റെ വസതിയിലാണ് റെയ്ഡ് നടക്കുന്നത്. ഇതോടൊപ്പം തന്നെ ഗാര്‍ ബാന്ദ്ര മേഖലകളിലുള്ള വസതികളിലും ഒരേസമയം റെയ്ഡ് നടക്കുന്നുണ്ട്.
ഏതാനും ദിവസം മുന്‍പ് അര്‍ജുന്‍ രാംപാലിന്റെ പങ്കാളി ഗബ്രിയേല ദിമിത്രിയേഡസിന്റെ സഹോദരനായ അജിസിലാവോസ് ദിമിത്രിയേഡസിനെയും നാര്‍ക്കോട്ടിക്സ് കണ്‍ട്രോള്‍ ബ്യൂറോ അറസ്റ്റ് ചെയ്തിരുന്നു. ഇയാളുടെ കയ്യില്‍ നിന്നും ഹാഷിഷും മറ്റു ലഹരിമരുന്ന് ടാബ്ലറ്റുകളും നാര്‍ക്കോട്ടിക്സ് കണ്‍ട്രോള്‍ ബ്യൂറോ കണ്ടെടുത്തു. ഏതാനും ദിവസങ്ങളായി ബോളിവുഡ് താരങ്ങളെ വിടാതെ പിന്തുടരുകയാണ് എന്‍.സി.ബി.
ബോളിവുഡ് സംവിധായകനായ ഫിറോസ് നദിയദ്വാലയുടെ വീട്ടിലും ശനിയാഴ്ച നര്‍ക്കോട്ടിക് ഉദ്യോഗസ്ഥര്‍ റെയ്ഡ് നടത്തിയിരുന്നു. ഇവിടെനിന്നും മൂന്നര ലക്ഷത്തിലധികം രൂപയും കഞ്ചാവും ചരസും, ലഹരിമരുന്നായ എം.ഡിയും ഉദ്യോഗസ്ഥര്‍ പിടിച്ചെടുത്തിരുന്നു. ഇതേ തുടര്‍ന്ന് സംവിധായകന്റെ ഭാര്യ ശബാന സയ്യിദിനെ ഉദ്യോഗസ്ഥര്‍ അറസ്റ്റ് ചെയ്തു.
