തിരുവനന്തപുരം: നടന്‍ ഉണ്ണി രാജന്‍ പി.ദേവിന്റെ ഭാര്യ പ്രിയങ്ക ആത്മഹത്യ ചെയ്ത സംഭവത്തില്‍ ഭര്‍തൃമാതാവ് ശാന്താ രാജന്‍ പി.ദേവിന്റെ അറസ്റ്റ് വൈകുന്നു. കോവിഡാണെന്ന പേരിലാണ് കേസിലെ രണ്ടാം പ്രതിയായ ശാന്താ രാജന്‍ പി.ദേവിനെ അറസ്റ്റ് ചെയ്യാത്തതെന്നാണ് പോലീസ് നല്‍കുന്ന വിവരം. അതേസമയം, അറസ്റ്റ് വൈകിക്കുന്നത് കേസ് അട്ടിമറിക്കാനുള്ള നീക്കമാണെന്ന് ആരോപിച്ച്‌ പ്രിയങ്കയുടെ കുടുംബം മുഖ്യമന്ത്രിക്ക് പരാതി നല്‍കാനൊരുങ്ങുകയാണ്. അതേസമയം, ജീവനൊടുക്കുന്നതിന് മുന്‍പ് പ്രിയങ്ക പൊലീസില്‍ നല്‍കിയ പരാതിയിലും മൊഴിയിലും പറഞ്ഞിരുന്നത് ഭര്‍ത്താവ് ഉണ്ണിയേക്കാളധികം ഉപദ്രവിച്ചത് ഭര്‍തൃമാതാവ് ശാന്തയാണെന്നായിരുന്നു. അതിനാല്‍ തന്നെ ആത്മഹത്യക്ക് മുഖ്യകാരണക്കാരിയെന്ന് കരുതുന്ന ഭര്‍തൃമാതാവിന്റെ അറസ്റ്റ് വൈകുന്നത് പ്രിയങ്കയുടെ കുടുംബത്തിന് ഇരട്ടിയാഘാതമാവുകയാണ്. ഭര്‍ത്താവ് ഉണ്ണിയുടെ അറസ്റ്റ് കഴിഞ്ഞ് 13 ദിവസമായി. ഭര്‍ത്തൃമാതാവിന് കോവിഡാണങ്കില്‍ രോഗമുക്തി നേടേണ്ട സമയമായി, എന്നിട്ടും പോലീസ് ഇടപെടുന്നില്ലെന്നാണ് പ്രിയങ്കയുടെ കുടുംബം പറയുന്നത്. അതേസയമം, കോവിഡ് നെഗറ്റീവ് സര്‍ട്ടിഫിക്കറ്റ് കിട്ടിയില്ലെന്നാണ് നെടുമങ്ങാട് പൊലീസ് പറയുന്നത്.കഴിഞ്ഞ പത്താം തീയതി രാത്രിയില്‍ പ്രിയങ്കയെ വീട്ടില്‍ നിന്ന് ഇറക്കിവിടുകയും ഉണ്ണിയും അമ്മ ശാന്തയും ചേര്‍ന്ന് മര്‍ദിച്ചെന്നുമാണ് പ്രിയങ്ക പോലീസില്‍ നല്‍കിയിരുന്ന പരാതി. 12ന് സ്വന്തം വീട്ടില്‍ മടങ്ങിയെത്തിയ ശേഷമാണ് പ്രിയങ്ക തൂങ്ങിമരിച്ചത്.
പ്രിയങ്കയെ ഭര്‍ത്താവിനേക്കാള്‍ കൂടുതല്‍ ഉപദ്രവിച്ചത് ഭര്‍ത്തൃമാതാവ്; ശാന്താ രാജന്‍ പി.ദേവിന്റെ അറസ്റ്റ് വൈകുന്നു; ആശങ്കയില്‍ യുവതിയുടെ കുടുംബം
