മീനങ്ങാടി: വയനാട് മീനങ്ങാടി മുരണി കുണ്ടുവയലില്‍ കഴിഞ്ഞ ദിവസം കാണാതായ കര്‍ഷകന്‍ കീഴാനിക്കല്‍ സുരേന്ദ്രന് (55) വേണ്ടിയുള്ള തെരച്ചില്‍ പുനരാരംഭിച്ചു.
എന്‍ഡിആര്‍എഫ്, സുല്‍ത്താന്‍ബത്തേരി, കല്‍പ്പറ്റ, മാനന്തവാടി അഗ്നിരക്ഷാസേനാംഗങ്ങള്‍, പള്‍സ് എമര്‍ജന്‍സി ടീമംഗങ്ങള്‍ എന്നിവരാണ് വ്യാഴാഴ്ച രാവിലെയോടെ തെരച്ചില്‍ ആരംഭിച്ചത്.
ബുധനാഴ്ച ഒന്നരയോടെ വീട്ടില്‍നിന്ന് 100 മീറ്റര്‍ മാറി പുഴയുടെ സമീപത്തെ റബ്ബര്‍തോട്ടത്തില്‍ പുല്ലരിയുന്നതിനിടെയാണ് സുരേന്ദ്രനെ കാണാതായത്.
പുഴയില്‍നിന്ന് കയറിവന്ന ഏതോ ജീവിയാകാം സുരേന്ദ്രനെ കൊണ്ടുപോയതെന്നാണ് നാട്ടുകാര്‍ പറയുന്നത്. സംഭവസ്ഥലത്ത് പുല്ലിലൂടെ ഏതോ അജ്ഞാതജീവി വലിച്ചുകൊണ്ടുപോയ പാടുകളുണ്ട്.
മാത്രമല്ല പുല്ലൊഴിഞ്ഞ ഭാഗത്ത് അവ്യക്തമായ മൂന്ന് കാല്‍പ്പാടുകളുമുണ്ട്. പുല്ലരിഞ്ഞതിന് സമീപത്ത് സുരേന്ദ്രന്‍റെ ഒരു ബൂട്ടും കണ്ടെത്തിയിട്ടുണ്ട്.
സുല്‍ത്താന്‍ബത്തേരിയില്‍ നിന്ന് ഫയര്‍ഫോഴ്‌സും മീനങ്ങാടി പോലീസും പള്‍സ് എമര്‍ജന്‍സി ടീമംഗങ്ങളും ഗ്രാമ പഞ്ചായത്ത് പ്രതിനിധികളും നാട്ടുകാരും സ്ഥലത്തെത്തി പുഴയില്‍ ബുധനാഴ്ച ഇരുട്ടുവീഴുംവരെ തെരച്ചില്‍ നടത്തിയെങ്കിലും സുരേന്ദ്രനെ കണ്ടെത്താനായില്ല.
ശക്തമായ മഴയില്‍ കാരാപ്പുഴയില്‍നിന്ന് ഒഴുകിയെത്തുന്ന വെള്ളം കുണ്ടുവയല്‍ പുഴയിലൂടെ ഒഴുകിയാണ് കടന്നുപോകുന്നത്. അതുകൊണ്ടുതന്നെ പുഴയില്‍ നല്ല അടിയൊഴുക്കുണ്ട്.
മീനങ്ങാടി ഗ്രാമപഞ്ചായത്ത് പ്രസിഡന്‍റ് കെ.ഇ. വിനയന്‍, ബ്ലോക്ക് പഞ്ചായത്ത് പ്രസിഡന്‍റ് സി അസൈനാര്‍, വാര്‍ഡ് മെമ്പര്‍ ബേബി വര്‍ഗീസ്, മീനങ്ങാടി പോലീസ് സ്റ്റേഷന്‍ ഓഫീസര്‍ ബിജു ആന്‍റണി തുടങ്ങിയവര്‍ ബുധനാഴ്ച തെരച്ചിലിന് നേതൃത്വം നല്‍കി.
മുതലയുടെ ആക്രമണമുണ്ടായാതായാണ് നാട്ടുകാരില്‍ ചിലരെങ്കിലും സംശയിക്കുന്നത്. എന്നാല്‍, വയനാട്ടിലെ പുഴകളില്‍ മുതലയുടെ സാന്നിധ്യം ഇതുവരെ സ്ഥിരീകരിച്ചിട്ടില്ല.
ചീങ്കണ്ണികളെ പലയിടത്തും കാണാറുണ്ട്.വന്യജീവിയുടെ ആക്രമണമുണ്ടായതാണോയെന്ന സംശയവും പറയുന്നുണ്ട്. മീനങ്ങാടിക്കടുത്ത് കൃഷ്ണഗിരിയിലും സമീപപ്രദേശങ്ങളിലും കടുവയിറങ്ങുന്നതും പതിവായിരുന്നു.
ഇത്തരത്തില്‍ സംശയങ്ങള്‍ നിരവധിയുണ്ടെങ്കിലും ഒന്നിനും സ്ഥിരീകരണമായിട്ടില്ല. പുല്ലരിയാന്‍ പോയ ഭര്‍ത്താവിനെ ഏറെ സമയം കഴിഞ്ഞിട്ടും കാണാത്തതിനെ തുടര്‍ന്ന് തിരഞ്ഞിറങ്ങിയ ഭാര്യ പുഴക്കരയിൽ പിടിവലി നടന്നതിൻ്റെയും എന്തോ വലിച്ചിഴച്ചതിൻ്റെയും പാടുകൾ കണ്ടിരുന്നു.
ഇതുകണ്ട് കുഴഞ്ഞുവീണ ഷൈലജയെ മീനങ്ങാടിയിലെ സ്വകാര്യ ക്ലിനിക്കില്‍ പ്രവേശിപ്പിച്ച് പ്രാഥമിക ചികിത്സ നല്‍കുകയായിരുന്നു. വിവരമറിഞ്ഞ് നൂറുകണക്കിന് ആളുകളാണ് ഇന്നലെയും ഇന്നുമായി പ്രദേശത്തെത്തിയത്.
സുരേന്ദ്രനെ കാണാതായതും എന്തുപറ്റിയതാണെന്ന് ഇതുവരെ സ്ഥിരീകരിക്കാന്‍ സാധിക്കാത്തതിന്‍റെയും ഞെട്ടലിലാണ് നാട്.
