മമ്മൂട്ടി പിറന്നാളിന് ക്ഷണിച്ചില്ലെന്ന വിഷമം ഇനി പീലിമോള്‍ക്ക് ഉണ്ടാവില്ല. കുട്ടി ആരാധികയുടെ പിറന്നാളിന് സര്‍പ്രൈസ് സമ്മാനം നല്‍കി ഞെട്ടിച്ചിരിക്കുകയാണ് സൂപ്പര്‍താരം. പുത്തനുടുപ്പും പിറന്നാള്‍ കേക്കും ചോക്ലേറ്റുമായി കൈനിറയെ സമ്മാനങ്ങളാണ് പിറന്നാളുകാരിക്ക് മമ്മൂക്ക നല്‍കിയത്. സമ്മാനങ്ങള്‍ക്കൊപ്പം വിഡിയോ കോളില്‍ എത്തി കുട്ടി ആരാധികയ്ക്ക് പിറന്നാള്‍ ആശംസകളും നേര്‍ന്നു.
മമ്മൂക്കയുടെ പിറന്നാള്‍ ആഘോഷത്തിന് പിന്നാലെയാണ് ഒരു കുട്ടിക്കുറിമ്ബിയുടെ വിഡിയോ സോഷ്യല്‍ മീഡിയയില്‍ വൈറലായത്. മമ്മൂട്ടി തന്നെ ബര്‍ത്ത്ഡേയ്ക്ക് ക്ഷണിച്ചില്ല എന്നു പറഞ്ഞ് വാശിപിടിച്ചു കരയുകയായിരുന്നു നാലുവയസുകാരി പീലിമോള്‍.
കുഞ്ഞ് ആരാധികയെ തേടി മമ്മൂട്ടി വിഡിയോ സോഷ്യല്‍ മീഡിയയില്‍ പങ്കുവെക്കുകയും ചെയ്തു. കഴിഞ്ഞ ദിവസം പീലിമോളുടെ പിറന്നാളാണെന്ന് അറിഞ്ഞതോടെ മമ്മൂട്ടി സമ്മാനങ്ങള്‍ അയക്കുകയായിരുന്നു.
പീലിമോള്‍ക്ക് ഒരുപാട് സ്നേഹത്തോടെ മമ്മൂട്ടി എന്ന് എഴുതിയ കേക്കാണ് സമ്മാനിച്ചത്. ഫാന്‍സ് അസോസിയേഷന്റെ അംഗത്തിന്റെ ഫോണിലേക്ക് വിഡിയോ കോള്‍ വിളിച്ചാണ് പീലിമോളോട് താരം വിശേഷം അന്വേഷിച്ചത്.
സന്തോഷമായോ എന്നും ഉടുപ്പ് ഇഷ്ടമായോ എന്നുമെല്ലാം തന്റെ കുട്ടി ആരാധികയോട് താരം ചോദിക്കുന്നുണ്ട്. അമ്മയുടെ ഒക്കത്തിരുന്ന് ഇതിനെല്ലാം പീലിമോള്‍ മറുപടിയും പറയുന്നുണ്ട്. സോഷ്യല്‍ മീഡിയയില്‍ വൈറലാവുകയാണ് കുഞ്ഞ് ആരാധികയുടെ പിറന്നാള്‍ ആഘോഷം.
