കൊച്ചി : എസ്എഫ്ഐ സംസ്ഥാന സെക്രട്ടറി പി.എം.ആർഷോയുടെ ജാമ്യം കോടതി റദ്ദാക്കി. ജാമ്യ വ്യവസ്ഥകൾ ലംഘിച്ചെന്ന പൊലീസ് റിപ്പോർട്ടിനെ തുടർന്ന് എറണാകുളം സിജെഎം കോടതിയുടേതാണു നടപടി.
കോടതി ജാമ്യം റദ്ദാക്കിയ സാഹചര്യത്തിൽ വീണ്ടും അറസ്റ്റു ചെയ്യാനാണു പൊലീസ് തീരുമാനം. അഭിഭാഷകനെ വധിക്കാൻ ശ്രമിച്ചെന്ന കേസിലാണ് ആർഷോയുടെ ജാമ്യം റദ്ദാക്കിയത്.
ശനിയാഴ്ചകളിൽ മുടങ്ങാതെ അന്വേഷണ ഉദ്യോഗസ്ഥനു മുൻപാകെ ഹാജരാകണമെന്നായിരുന്നു ജാമ്യം നൽകുമ്പോൾ കോടതി നിർദേശിച്ചിരുന്നത്. ഇതടക്കമുള്ള ജാമ്യ വ്യവസ്ഥകൾ ആർഷോ ലംഘിച്ചതായി പൊലീസ് കോടതിയെ അറിയിച്ചു.
നേരത്തേയും ജാമ്യ വ്യവസ്ഥകൾ ലംഘിച്ചതിന് ആർഷോയുടെ ജാമ്യം കോടതി റദ്ദാക്കിയിട്ടുണ്ട്.