കുഞ്ചാക്കോ ബോബന്‍ നായകനാകുന്ന പുതിയ മലയാള സിനിമ നിഴലില്‍ നയന്‍താരയാണ് നായികയാകുന്നത്. ഈ പ്രത്യേകത കൊണ്ട് തന്നെ ചിത്രം ഇതിനോടകം ചര്‍ച്ച ചെയ്യപ്പെട്ടിരുന്നു. ഇപ്പോഴിതാ ചിത്രത്തിന്റെ ഫോട്ടോ ഓണ്‍ലൈനില്‍ തരംഗമാകുകയാണ്. ചിത്രത്തിലെ കുഞ്ചാക്കോ ബോബന്റെ ലുക്കാണ് പുതുതായി പുറത്തുവിട്ടിരിക്കുന്നു. കുഞ്ചോക്കോ ബോബന്‍ തന്നെയാണ് ഫോട്ടോ പങ്കുവക്കുകയുണ്ടായത്. കുഞ്ചാക്കോ ബോബന്റെ ലുക്കിനെ കുറിച്ച്‌ ആരാധകര്‍ക്കിടയില്‍ ചര്‍ച്ച നടക്കുകയാണ്.
കുഞ്ചാക്കോ ബോബന്റെ മാസ്‍ക്കാണ് ആരാധകരുടെ ചര്‍ച്ചയ്‍ക്ക് കാരണമായത്. സൂപ്പര്‍ ഹീറോ കഥാപാത്രമാണോ എന്നാണ് ചിലരുടെ സംശയം. എന്നാല്‍ മുഖത്തിന്റെ എല്ലുകള്‍ക്ക് പരുക്കുണ്ടേല്‍ വയ്‍ക്കുന്നതല്ലേയെന്ന് ചിലര്‍ സൂചിപ്പിക്കുന്നു. ടൊവിനോയുടെ സൂപ്പര്‍ ഹിറ്റ് ചിത്രവും കുഞ്ചാക്കോ ബോബന്റെ ചിത്രവും വന്നാല്‍ ഗംഭീരമായി എന്നും ചിലര്‍ കൂട്ടിച്ചേര്‍ത്തു. സിനിമയിലെ നായകനായ കുഞ്ചാക്കോ ബോബന്റെയും നായികയായ നയന്‍താരയുടെയും കഥാപാത്രം എത് തരത്തിലുള്ളതായിരിക്കും എന്ന് ഇതുവരെയും പുറത്തുവിട്ടിട്ടില്ല. രാജ്യാന്തര പുരസ്‍കാരങ്ങളും സംസ്ഥാന സര്‍ക്കാറിന്റെ അംഗീകാരങ്ങളും നേടിയിട്ടുള്ള എഡിറ്റര്‍ അപ്പു ഭട്ടതിരി ആദ്യമായി സംവിധാനം ചെയ്യുന്ന ചിത്രം എന്ന പ്രത്യേകതയും നിഴലിനുണ്ട്.
ചിത്രത്തിന്റെ തിരക്കഥയെഴുതുന്നത് എസ് സഞ്‍ജീവ് ആണ് . ദീപക് ഡി മേനോന്‍ ഛായാഗ്രാഹണം നിര്‍വഹിക്കുന്നു. സംവിധായകനായ അപ്പു എന്‍ ഭട്ടതിരിക്കൊപ്പം അരുണ്‍ലാല്‍ എസ് പിയും ചേര്‍ന്നാണ് എഡിറ്റിംഗ് കൈകാര്യം ചെയ്യുന്നത്. സ്റ്റെഫി സേവ്യര്‍ ആണ് ചിത്രത്തിന്റെ വസ്‍ത്രാലങ്കാരം നിര്‍വഹിക്കുന്നത്. ആന്റോ ജോസഫ് ഫിലിം കമ്ബനിക്കൊപ്പം അഭിജിത് എം പിള്ള, ബാദുഷ, ഫെല്ലിനി ടി പി, ഗണേഷ് ജോസ് തുടങ്ങിയവര്‍ ഒന്നിച്ചാണ് ചിത്രം നിര്‍മിക്കുന്നത്. സൂരജ് എസ് കുറുപ്പ് ആണ് സംഗീത സംവിധായകന്‍. ഉമേഷ് രാധാകൃഷ്‍ണന്‍ ആണ് ചീഫ് അസോസിയേറ്റ് ഡയറക്ടര്‍. മലയാളത്തിലെ മറ്റ് പ്രമുഖ അഭിനേതാക്കളും ചിത്രത്തില്‍ എത്തുന്നുണ്ട്.
