കല്‍പ്പറ്റ: ജൂണ്‍ നാലിന് ഫലം പുറത്തുവന്നപ്പോള്‍ രാഹുല്‍ ഗാന്ധി മത്സരിച്ച രണ്ട് മണ്ഡലങ്ങളിലും തിളക്കമാർന്ന ജയം.
ഇതോടെ വയനാട് ഉപേക്ഷിക്കുമെന്ന് കോണ്‍ഗ്രസ് ക്യാമ്ബുകള്‍ക്ക് ധാരണയുണ്ടായിരുന്നു.
ഉത്തരേന്ത്യയില്‍ കോണ്‍ഗ്രസ് നേടിയെടുത്ത വിജയത്തിന് രാഹുല്‍ റായ്ബറേലി നിലനിർത്തേണ്ടത് അത്യാവശ്യമാണെന്ന് പാർട്ടിയിലെ അണികള്‍ക്ക് പോലും അറിയാം.
എന്നാല്‍ സസ്‌പെൻസുകള്‍ നിറച്ച്‌ ഇന്നെലയാണ് രാഹുല്‍ വയനാട് ഒഴിയുന്ന കാര്യത്തില്‍ അന്തിമ തീരുമാനമെടുത്തത്.
ഇതോടൊപ്പം സഹോദരിയും എഐസിസി ജനറല്‍ സെക്രട്ടറിയുമായ പ്രിയങ്ക ഗാന്ധി തനിക്ക് പകരക്കാരിയായി വയനാട്ടില്‍ ഉണ്ടാവുമെന്ന് രാഹുല്‍ പ്രഖ്യാപിച്ചു.
2024 ലോക്‌സഭ തിരഞ്ഞെടുപ്പ് സ്ഥാനാർത്ഥി ചർച്ചകള്‍ക്കിടെ താൻ മത്സരരംഗത്തുണ്ടാവില്ലെന്ന് പ്രിയങ്ക പറയാതെ പറഞ്ഞിരുന്നു.
ഇനി മത്സരിക്കുന്നുണ്ടെങ്കില്‍ കുടുംബവുമായി ഏറ്റവും അടുത്ത അമേത്തിയിലായിരിക്കുമെന്നാണ് എല്ലാവരും കരുതിയിരുന്നു.
എന്നാല്‍ എല്ലാ പ്രതീക്ഷകളും തെറ്റിച്ച്‌ പ്രിയങ്കയുടെ ചുരം കയറിയുള്ള വരവ് വയനാട് മാത്രം പിടിക്കാനാണോ?
കോണ്‍ഗ്രസ് ഏത് സ്ഥാനാർത്ഥിയെ മത്സരിപ്പിച്ചാല്‍ വിജയം ഉറപ്പാക്കുന്ന വയനാട്ടില്‍ എന്തുകൊണ്ട് പ്രിയങ്ക?
2024 ലോക്‌സഭ തിരഞ്ഞെടുപ്പില്‍ അമേത്തിയില്‍ സ്മൃതി ഇറാനിക്കെതിരെ മത്സരിക്കാൻ പ്രിയങ്ക ഇറങ്ങിയേക്കുമെന്ന റിപ്പോർട്ടുകളുണ്ടായിരുന്നു.
എന്നാല്‍ പ്രിയങ്ക മത്സരിച്ചാല്‍ ‘കുടുംബ രാഷ്ട്രീയം’ തിരഞ്ഞെടുപ്പില്‍ ബിജെപി ആയുധമാക്കുമെന്ന് നേതൃത്വത്തിന് വ്യക്തമായ ബോദ്ധ്യമുണ്ടായിരുന്നു.
2019 മുതലേ പ്രിയങ്കയുടെ പേര് മത്സരരംഗത്ത് സജീവമായിരുന്നു.
എന്നാല്‍ പാർട്ടി നേതൃത്വത്തില്‍ മാത്രം സജീവമായ പ്രിയങ്ക ആദ്യ മത്സരം ഇപ്പോള്‍ വയനാട്ടില്‍ കുറിക്കാൻ തീരുമാനിക്കുകയായിരുന്നു.
വയനാട് ലോക്‌സഭാ മണ്ഡലം കോണ്‍ഗ്രസിന് സുരക്ഷിതമായ സീറ്റാണ്. 2009 ശേഷം നടന്ന എല്ലാ തിരഞ്ഞെടുപ്പുകളിലും കോണ്‍ഗ്രസാണ് മണ്ഡലത്തില്‍ വിജയിച്ചത്.
ഒരു പക്ഷേ, ഈ തിരഞ്ഞെടുപ്പില്‍ ബിജെപി 300 കൂടുതല്‍ സീറ്റുകളുമായി അധികാരത്തില്‍
എത്തിയിരുന്നെങ്കില്‍ പ്രിയങ്ക ഗാന്ധി വയനാട്ടില്‍ മത്സരിക്കാല്‍ ഒരു സാദ്ധ്യതയുമില്ലെന്നാണ് നേതാക്കള്‍ പറയുന്നത്.
ബിജെപിയുടെ ആധിപത്യം കുറയുകയാണെന്നും പ്രിയങ്കയ്ക്ക് അരങ്ങേറ്റം കുറിക്കാൻ ഇതാണ് ഏറ്റവും മികച്ച സമയമെന്നും നേതാക്കള്‍ വിശ്വസിക്കുന്നു.
ഇതോടെ ഗാന്ധി കുടുംബത്തില്‍ നിന്നുള്ള നേതാക്കള്‍ ഉത്തരേന്ത്യയിലും ദക്ഷിണേന്ത്യയിലും പ്രതിനിധീകരിക്കുന്നു എന്ന മറ്റൊരു പ്രത്യേകതയുമുണ്ടാകും.
‘സൗത്ത് സ്ട്രാറ്റജി’ എന്ന നിലയില്‍ കേരളം കോണ്‍ഗ്രസിന് ഏറ്റവും പ്രധാനപ്പെട്ടതാണ്. ആ പ്രാധാന്യമാണ് പ്രിയങ്കയുടെ സ്ഥാനാർത്ഥിത്വത്തിലൂടെ പ്രതിഫലിപ്പിക്കുന്നത്. കർണാടകയില്‍ ഗാന്ധി കുടുംബത്തിന് ഏറ്റവും അടുപ്പമുള്ള നേതാവെന്ന നിലയില്‍ ഡികെ ശിവകുമാർ ഉണ്ട്. തമിഴ്നാട്ടില്‍ നേരിട്ട് പ്രാതിനിധ്യമില്ല. അതുകൊണ്ട് തന്നെ വയനാട് ഗാന്ധി കുടുംബത്തെ സംബന്ധിച്ച്‌ ഏറ്റവും പ്രധാനപ്പെട്ടതാണ്. ബിജെപിയുടെ വോട്ടുശതമാനം കൂടിവരുന്ന വേളയില്‍ കേരളത്തിലെ തിരഞ്ഞെടുപ്പ് രംഗത്തേക്ക് കോണ്‍ഗ്രസ് നേരിട്ട് കൈവെക്കുകയാണെന്ന് നേതൃത്വം പറയാൻ ശ്രമിക്കുന്നുവെന്നാണ് പ്രിയങ്കയുടെ നേരിട്ടുള്ള പ്രവേശനം അർത്ഥമാക്കുന്നത്.
രാഹുലിന് പകരം പ്രിയങ്കയെ മത്സരിപ്പിച്ചതിലൂടെ, തിരഞ്ഞെടുപ്പ് നേട്ടമുണ്ടാക്കിയിട്ടും ദക്ഷിണേന്ത്യയെ കൈവിട്ടുവെന്ന വിമർശനവും ഗാന്ധി കുടുംബം ഒഴിവാക്കും. കൂടാതെ 2029 പൊതുതിരഞ്ഞെടുപ്പില്‍ പ്രിയങ്കയെ മുന്നില്‍ നിർത്തി ദക്ഷിണേന്ത്യയില്‍ നേട്ടമുണ്ടാക്കാമെന്നും നേതൃത്വം കരുതുന്നു. ഈ തിരഞ്ഞെടുപ്പ് കഴിഞ്ഞതോടെ മോദി തരംഗം അസ്തമിച്ചെന്നാണ് പ്രതിപക്ഷം പറയുന്നത്. കേന്ദ്രത്തില്‍ കൂട്ടു കക്ഷി സർക്കാർ അധികാരത്തിലേറിയതോടെ ബിജെപി ശരിക്കും പ്രതിസന്ധിയിലുമാണ്. ഈ സമയത്ത് പ്രതിപക്ഷത്തിന്റെ ബെഞ്ചില്‍ രാഹുലും പ്രിയങ്കയും ഒരുമിച്ചുണ്ടാകുന്നത് എൻഡിഎയ്ക്ക് പുതിയ തലവേദന സൃഷ്ടിക്കും.
