കാക്കനാട്: വീട് ജപ്തി ചെയ്യാനെത്തിയ അഡ്വക്കറ്റ് കമീഷനെയും ബാങ്ക് ഉദ്യോഗസ്ഥരെയും ആക്രമിച്ച കേസില്‍ യുവാവ് അറസ്റ്റില്‍.
ചെമ്ബുമുക്കിനുസമീപം റോസ്വില്ലയില്‍ കെവിനെയാണ് (37) തൃക്കാക്കര പൊലീസ് അറസ്റ്റ് ചെയ്തത്. സംഭവത്തില്‍ അഡ്വക്കറ്റ് കമീഷന്‍റെ കൈക്ക് പരിക്കേറ്റിരുന്നു.
കഴിഞ്ഞ ബുധനാഴ്ച രാവിലെ 11ഓടെയായിരുന്നു സംഭവം. വീടിന്‍റെ ഹാളില്‍വെച്ച്‌ കെവിന്‍ വാക്കത്തി വീശി ഭീകരാന്തരീക്ഷം സൃഷ്ടിക്കുകയുമായിരുന്നു.
2016ല്‍ എസ്.ബി.ഐയുടെ എസ്.എം.ഇ ശാഖയില്‍നിന്ന് ബിസിനസ് ആവശ്യത്തിന് ഇവര്‍ വന്‍തുകയുടെ വായ്പ എടുത്തിരുന്നു. ഇതിന്‍റെ തിരിച്ചടവ് മുടങ്ങിയതോടെ എറണാകുളം സി.ജെ.എം കോടതിയുടെ ഉത്തരവിനെത്തുടര്‍ന്നാണ് ജപ്തി ചെയ്യാന്‍ തീരുമാനിച്ചത്. കൊച്ചി സിറ്റി പൊലീസ് കമീഷണറുടെ നിര്‍ദേശപ്രകാരം, ഡെപ്യൂട്ടി കമീഷണര്‍ വി.യു. കുര്യാക്കോസിന്‍റെ നേതൃത്വത്തില്‍ തൃക്കാക്കര പൊലീസും സംഘവും ചേര്‍ന്നാണ് പ്രതിയെ പിടികൂടിയത്.
