കാഞ്ഞങ്ങാട് : ലോഡ്ജിൽ യുവതിയെ കുത്തിക്കൊന്ന സംഭവത്തിൽ കൂടുതൽ വിവരങ്ങൾ പുറത്ത്.
കൊല്ലപ്പെട്ട ഉദുമ ബാര മുക്കന്നോത്ത് സ്വദേശിനി ദേവികയും പ്രതി സതീഷും തമ്മിൽ വിവാഹത്തിന് മുന്നേ അടുപ്പത്തിലായിരുന്നെന്നും ഒൻപത് വർഷമായി ബന്ധത്തിലായിരുന്നെന്നുമാണ് പോലീസ് പറയുന്നത്.
അതിനിടെ സതീഷ് യുവതിയെ ബലം പ്രയോഗിച്ച് ലോഡ്ജിലേക്ക് കൊണ്ടുപോകുന്ന ദൃശ്യങ്ങൾ പുറത്തുവന്നിട്ടുണ്ട്.
കൊലപാതക ശേഷം പ്രതി സതീഷ് സ്റ്റേഷനിലേക്ക് കീഴടങ്ങാനെത്തിയ രംഗം ഹൊസ്ദുർഗ് ഇൻസ്പെക്ടർ കെ പി ഷൈൻ വിവരിക്കുകയും ചെയ്തു.
ചോരപുരണ്ട കത്തിയുമായെത്തി താൻ ഒരാളെ കൊന്നെന്ന് പ്രതി പറഞ്ഞെന്നാണ് പോലീസ് ഉദ്യോഗസ്ഥൻ പറയുന്നത്. മാതൃഭൂമി ന്യൂസാണ് ഇക്കാര്യം റിപ്പോർട്ട് ചെയ്തിരിക്കുന്നത്.
ചൊവ്വാഴ്ച നാല് മണി കഴിഞ്ഞപ്പോഴാണ് സതീഷ് സ്റ്റേഷനിലേക്ക് എത്തിയത്. ഒരു കാര്യം സംസാരിക്കാനുണ്ടെന്ന് പറഞ്ഞതോടെ ഓഫീസ് മുറിയിലെത്തി.
ഇവിടെ നിന്നാണ് ഞെട്ടിക്കുന്ന വിവരങ്ങൾ പ്രതി പറഞ്ഞതെന്നാണ് ഉദ്യോഗസ്ഥൻ വിവരിക്കുന്നത്.
ഇരിക്കാൻ ആവശ്യപ്പെട്ടപ്പോൾ അതിന് തയ്യാറാകാതെ പ്രതി സ്വയം പരിചയപ്പെടുത്തുകയായിരുന്നു. അതിന് പിന്നാലെ തന്നെ ഞാൻ ഒരാളെ കൊന്നെന്നും പറഞ്ഞു.
താൻ കളിയാക്കുകയാണോ എന്ന് ചോദിച്ചപ്പോൾ അല്ല സർ, ഒരാളെ കൊന്നിട്ടാണ് വരുന്നതെന്ന് ആവർത്തിക്കുകയായിരുന്നെന്നും ഇൻസ്പെക്ടർ പറഞ്ഞു.
ഇതിന് പിന്നാലെ പാന്‍റിന്‍റെ കീശയിൽ നിന്നാണ് കത്തിയെടുത്തത്. ഒരു പൊതിയിലായിരുന്നു കത്തി. ഇതുകൊണ്ടാണ് കൊന്നതെന്ന് പറഞ്ഞ് അതെടുത്ത് കാണിച്ചപ്പോൾ കത്തി നിറയെ ചോരയായിരുന്നെന്നും ഉദ്യോഗസ്ഥൻ പറഞ്ഞു.
ഷർട്ടിലും ഉണങ്ങിയ ചോരപ്പാട് കണ്ടിരുന്നു. ഇരിക്കാൻ പറഞ്ഞ് കാര്യങ്ങൾ വിശദമായി ചോദിച്ചപ്പോഴാണ് ദേവികയുടെ പേര് പറഞ്ഞത്. മൃതദേഹം കിടന്നിരുന്ന ലോഡ്ജിന്‍റെ വിശദാംശങ്ങൾ പറഞ്ഞ് മുറിയുടെ താക്കോലും കൈമാറി.
ദേവിക മരിച്ചെന്ന് ഉറപ്പ് വരുത്തിയ ശേഷമാണ് താൻ വന്നതെന്നും സതീഷ് പറഞ്ഞിരുന്നു. തങ്ങൾ തമ്മിൽ വിവാഹത്തിന് മുന്നേയുള്ള ബന്ധമാണ്. തനിക്ക് അപകടം സംഭവിച്ചപ്പോൾ താൻ തന്നെയാണ് മറ്റൊരു വിവാഹം കഴിക്കാൻ പറഞ്ഞത്.
പിന്നീട് ഞാനും വേറെ വിവാഹം കഴിച്ചു. ഇപ്പോൾ ഭാര്യയെ ഉപേക്ഷിച്ച് വിവാഹം കഴിക്കണമെന്ന് പറയുകയാണ്. ജീവിക്കാൻ വിടില്ലെന്ന് ആയപ്പോഴാണ് കൊന്നതെന്നും പ്രതി പറഞ്ഞിരുന്നെന്ന് പോലീസിനെ ഉദ്ധരിച്ച് മാതൃഭൂമി ന്യൂസ് റിപ്പോർട്ട് ചെയ്തു.
