കൊച്ചി: (KVARTHA) ചലച്ചിത്ര അക്കാദമി ചെയർമാനെ ഉടൻ പുറത്താക്കണമെന്ന് സംവിധായകൻ ഡോ. ബിജു. ഫെയ്സ് ബുക്കിലൂടെയാണ് ബിജു ഈ ആവശ്യം ഉന്നയിച്ചത്.
ചലച്ചിത്ര അക്കാദമി ചെയർമാൻ രഞ്ജിത്ത് എതിരെ നിരവധി ഗുരുതരമായ ആരോപണങ്ങള്‍ ഉയർന്നിട്ടുണ്ട്.
അവാർഡ് നല്‍കല്‍, സിനിമ സെലക്ഷൻ, പ്രേക്ഷകരെ അധിക്ഷേപിക്കല്‍ തുടങ്ങി പല വിഷയങ്ങളിലുമാണ് ആരോപണങ്ങള്‍. ചലച്ചിത്ര അക്കാദമി ജനറല്‍ കൗണ്‍സില്‍ അംഗങ്ങള്‍ തന്നെ ചെയർമാനെ പുറത്താക്കണമെന്ന് ആവശ്യപ്പെട്ടിട്ടുണ്ട്.
ഇപ്പോള്‍ ഹേമ കമ്മിറ്റി റിപ്പോർട്ടിനെ തുടർന്ന് ഒരു നടിയുടെ വെളിപ്പെടുത്തലും ചെയർമാന് എതിരെ ഉണ്ടായിരിക്കുന്നു. ഒരു ലൈംഗിക ആരോപണം വളരെ ഗുരുതരമായി കണക്കാക്കപ്പെടേണ്ടതാണ്. ഉത്തരവാദിത്തപ്പെട്ട സ്ഥാനത്തുള്ള ഒരാളെ പറ്റി ഇത്തരം ആരോപണം ഉയർന്നാല്‍ അയാള്‍ക്ക് ആ സ്ഥാനത്ത് തുടരാൻ യാതൊരു ധാർമിക അധികാരവുമില്ല.
സാംസ്കാരിക മന്ത്രി ഇക്കാര്യത്തില്‍ ഇതുവരെ കാര്യമായ നടപടി സ്വീകരിച്ചിട്ടില്ല. അക്കാദമി ചെയർമാന് എതിരായ ആരോപണങ്ങളില്‍ സർക്കാർ പുലർത്തുന്ന നിശബ്ദത ആശങ്ക ഉളവാക്കുന്നതാണ്.
നമ്മുടെ നികുതി പണം കൊണ്ടാണ് ഈ സ്ഥാനത്ത് ഇരിക്കുന്നവർക്ക് ശമ്ബളം നല്‍കുന്നത്. അതുകൊണ്ട് നമുക്ക് ഇക്കാര്യത്തില്‍ പ്രതികരിക്കാനുള്ള പൂർണ അവകാശമുണ്ട്. ഈ ആരോപണങ്ങളുടെ സാമൂഹികമായ പ്രത്യാഘാതം വളരെ വലുതാണ്.
അതുകൊണ്ട് സർക്കാർ ഇക്കാര്യത്തില്‍ ഉടൻ തന്നെ ഇടപെടേണ്ടതാണ്. ചെയർമാൻ സ്വയം രാജി വെക്കുന്നതാണ് ഉചിതം. അല്ലെങ്കില്‍ സർക്കാർ അദ്ദേഹത്തെ പുറത്താക്കണം. ബിജു ആവശ്യപ്പെട്ടു.
ഫേസ്ബുക്ക് പോസ്റ്റിൻ്റെ പൂർണ്ണരൂപം
ചലച്ചിത്ര അക്കാദമി ചെയർമാന് എതിരെ നിരവധി ആരോപണങ്ങള്‍ കഴിഞ്ഞ മൂന്ന് വർഷമായി നിലവിലുണ്ട് .
ചലച്ചിത്ര അവാർഡില്‍ ചിലർക്ക് അവാർഡ് കൊടുക്കാനും ചില സിനിമകള്‍ക്ക് അവാർഡ് കൊടുക്കാതിരിക്കാനും അക്കാദമി ചെയർമാൻ നേരിട്ട് ജൂറിഅംഗങ്ങളെ സ്വാധീനിച്ചു എന്ന ഒരു പരാതി ഉണ്ടായിരുന്നല്ലോ . സംവിധായകൻ വിനയനും രണ്ടു ജൂറി അംഗങ്ങളും ഇത് തുറന്നു പറഞ്ഞിരുന്നു .
അതേപോലെ ഐ എഫ് എഫ് കെ യിലെ സിനിമാ സെലക്ഷനുമായി ബന്ധപ്പെട്ടും സിനിമ കാണാതെ ആണ് സെലക്ഷൻ നടത്തുന്നത് എന്ന് ഡിജിറ്റല്‍ തെളിവുകള്‍ ഹാജരാക്കി ഒട്ടേറെ സംവിധായകർ പരാതികള്‍ നല്‍കിയിരുന്നു .
ചലചിത്ര് മേളയുടെ സമാപന ചടങ്ങില്‍ പ്രേക്ഷകരെ നായകളോട് ഉപമിച്ചതും ഏറെ വിവാദം ആയിരുന്നു .
കഴിഞ്ഞ ഫിലിം ഫെസ്റ്റിവല്‍ വേളയില്‍ ഞാൻ ഉള്‍പ്പെടെ ഉള്ള ചില സിനിമാ പ്രവർത്തകരെ പൊതു മാധ്യമത്തില്‍ അധിക്ഷേപകരമായ പരാമർശം നടത്തിയതും ഇതേ ചെയർമാൻ ആണ് .
ചലചിത്ര അക്കാദമി ജനറല്‍ കൗണ്‍സില്‍ അംഗങ്ങള്‍ തന്നെ ചെയർമാനെ പുറത്താക്കണം എന്ന് പരസ്യമായി പ്രസ്താവന ഇറക്കിയതാണ് .
ഈ വിഷയങ്ങളില്‍ ഒക്കെ അന്വേഷിക്കും വിശദീകരണം ആവശ്യപ്പെട്ടിട്ടുണ്ട് എന്നൊക്കെ സാംസ്കാരിക മന്ത്രി പ്രസ്താവന ഇറക്കിയതല്ലാതെ ഒരു നടപടികളും ഇന്നേവരെ ഉണ്ടായിട്ടില്ല .
ഇപ്പോള്‍ ഇതാ ഹേമ കമ്മിറ്റി റിപ്പോർട്ടിനെ തുടർന്ന് ഒരു നടിയുടെ വെളിപ്പെടുത്തലും അക്കാദമി ചെയർമാന് എതിരെ ഉണ്ടായിരിക്കുന്നു . അല്പമെങ്കിലും ധാർമികത ബാക്കി ഉണ്ടെങ്കില്‍ അക്കാദമി ചെയർമാനെ ഉടൻ പുറത്താക്കേണ്ടതാണ് . ഉത്തരവാദിത്തപ്പെട്ട സ്ഥാനത്തിരിക്കുന്ന ഒരാളെ പറ്റി പരസ്യമായ ഒരു ലൈംഗിക ആരോപണം ഉയർന്നു വന്നത് നിസാരമായി കണക്കാക്കാൻ സാധിക്കില്ല .
സാംസ്കാരിക മന്ത്രിക്ക് ഇദ്ദേഹം ഇതിഹാസം ഒക്കെ ആയി തോന്നാം അത് അദ്ദേഹത്തിന്റെ സ്വാതന്ത്ര്യം . പക്ഷെ സ്ത്രീകളോട് അപമര്യാദയായി പെരുമാറി എന്ന് അനുഭവസ്ഥ തന്നെ വെളിപ്പെടുത്തിയ ഘട്ടത്തില്‍ ഒരു നിമിഷം പോലും അക്കാദമി ചെയർമാൻ സ്ഥാനത്ത് തുടരാൻ ശ്രീ രഞ്ജിത്ത് അർഹനല്ല .
ഇനി ഇത് പറയാനുള്ള എന്റെ റെലവൻസ്‌ എന്താണ് എന്ന് രഞ്ജിത്തിന് സംശയമുണ്ടെങ്കില്‍ ആ സംശയം ദൂരീകരിക്കാൻ ഞാൻ ഒരു നീണ്ട കുറിപ്പ് മുൻപ് എഴുതിയിരുന്നു . അതൊന്നും ഞാൻ ആവർത്തിക്കുന്നില്ല . ഇപ്പോള്‍ ഒരു റെലവൻസ്‌ മാത്രം പറയാം .
എന്റെ കൂടി നികുതി പണം ഉപയോഗിച്ചുള്ള തുക ആണ് നിങ്ങള്‍ ശമ്ബളം ആയി വാങ്ങുന്നത് , നിങ്ങളുടെ കാറിനു നല്‍കുന്നത് , നിങ്ങളുടെ വീട്ടു വാടക നല്‍കുന്നത് . സ്റ്റേറ്റിലെ നികുതി കൊടുക്കുന്ന ഒരു പൗരൻ എന്ന റെലവൻസ്‌ ഉപയോഗിച്ച്‌ പറയുകയാണ് . ഈ ആരോപണത്തിന്റെ വെളിച്ചത്തില്‍ അല്പമെങ്കിലും ധാർമികത ഉണ്ടെങ്കില്‍ സർക്കാർ അക്കാദമി ചെയർമാനെ അടിയന്തിരമായി പുറത്താക്കണം . ചെയർമാന് എതിരായ വിവിധ ആരോപണങ്ങളില്‍ സർക്കാർ ഇതുവരെ പുലർത്തിയ നിശബ്ദത , ഹേമ കമ്മിറ്റി റിപ്പോർട്ടിന്മേലുള്ള ഒളിച്ചുകളി എന്നിവ പരിഗണിക്കുമ്ബോള്‍, അക്കാദമി ചെയർമാൻ സ്വയം രാജി വെക്കാനോ പുറത്താക്കാനോ ഉള്ള സാധ്യത ഉണ്ടാകില്ല എന്നും അറിയാം . എങ്കിലും ഈ നാണംകെട്ട ഫ്യു ഡ ല്‍ വിഴുപ്പു ഭാണ്ഡങ്ങളെ ഉത്തരവാദിത്തപ്പെട്ട സ്ഥാനത്ത് ചുമക്കേണ്ടി വരുന്ന കേരളത്തിന്റെ ഒരവസ്ഥ പരിതാപകരം ആണ് എന്ന് പറയാതെ വയ്യ .
