കോട്ടയത്ത് വീട്ടില്‍ നിരീക്ഷണത്തിലായിരുന്ന എംബിബിഎസ് വിദ്യാര്‍ത്ഥിനിയെ തൂങ്ങിമരിച്ച നിലയില്‍ കണ്ടെത്തി. ചങ്ങനാശ്ശേരി പായിപ്പാട് കൃഷ്ണപ്രിയയെ (20) ആണ് മരിച്ച നിലയില്‍ കണ്ടെത്തിയത്. റഷ്യയില്‍ എംബിബിഎസ് വിദ്യാര്‍ത്ഥിനിയായിരുന്ന കൃഷ്ണപ്രിയ നാട്ടിലെത്തിയത് കഴിഞ്ഞ ആഴ്ചയാണ്. സ്വന്തം വീട്ടിലായിരുന്നു നിരീക്ഷണത്തില്‍ കഴിഞ്ഞിരുന്നത്.
മകള്‍ നിരീക്ഷണത്തിലായതിനാല്‍ അച്ഛനും അമ്മയും ബന്ധു വീട്ടിലായിരുന്നു. ഇന്നലെ വൈകിട്ട് വരെ മകളുടെ വിവരം ഫോണിലൂടെ അറിയാന്‍ സാധിക്കാതെ വന്നപ്പോഴാണ് ഇവര്‍ തിരക്കി എത്തിയത്. തുടര്‍ന്ന് അയല്‍വീട്ടുകാര്‍ ജനല്‍ചില്ല് തകര്‍ത്ത് നോക്കിയപ്പോഴാണ് വിദ്യാര്‍ഥിനിയെ തൂങ്ങിമരിച്ച നിലയില്‍ കണ്ടെത്തിയത്.
കൃഷ്ണപ്രിയയുടെ സ്രവം പരിശോധനയ്ക്കായി അയച്ചിട്ടുണ്ട്. ഇവര്‍ക്ക് രോഗലക്ഷണം ഉണ്ടായിരുന്നില്ല. പരിശോധനാഫലങ്ങള്‍ വന്നശേഷം മറ്റുനടപടികള്‍ പൂര്‍ത്തിയാക്കും. കൊവിഡ് നിരീക്ഷണത്തില്‍ കഴിഞ്ഞ മാനസിക സമ്മര്‍ദ്ദമാണോ ആത്മഹത്യയിലേക്ക് നയിച്ചതെന്ന് അടക്കമുളള കാര്യങ്ങള്‍ തൃക്കൊടിത്താനം പോലീസ് അന്വേഷിക്കുകയാണ്. വിദ്യാര്‍ഥിനിയുടെ മൊബൈല്‍ ഫോണ്‍, ലാപ്‌ടോപ്പ് എന്നിവയും പൊലീസ് പരിശോധിക്കുന്നുണ്ട്.
