കോട്ടയം: കോട്ടയത്ത് രണ്ടിടങ്ങളില്‍ ഓര്‍ത്തഡോക്‌സ് കുരിശടികള്‍ക്ക് നേരെ കല്ലേറ്. ഇന്നലെ രാത്രിയില്‍ ദേവലോകത്തും അമയന്നൂരിലും കുരിശടികള്‍ നശിപ്പിച്ചു. മലങ്കര ഓര്‍ത്തഡോക്‌സ് സഭ ആസ്ഥാനമായ ദേവലോകം അരമനയില്‍ നിന്നും അടിവാരത്തേക്കുള്ള റോഡിലെ കുരിശടിയാണ് അജ്ഞാതര്‍ നശിപ്പിച്ചത്. കല്ലേറില്‍ ഗ്ലാസുകള്‍ തകര്‍ന്നു. പൊലീസ് നടത്തിയ അന്വേഷണത്തില്‍ ബൈക്കിലെത്തിയ രണ്ടംഗ സംഘമാണ് ആക്രമണം നടത്തിയതെന്ന് കണ്ടെത്തിയിട്ടുണ്ട്. വളവിലായതിനാല്‍ സിസിടിവി ദൃശ്യങ്ങള്‍ അവ്യക്തമാണ്.
ഇന്നലെ രാത്രി തന്നെ അമയന്നൂര്‍ കാരാട്ടുകുന്നേല്‍ സെന്റ് മേരീസ് ഓര്‍ത്തഡോക്‌സ് പള്ളിയുടെ കീഴിലെ മാര്‍ ഗ്രിഗോറിയോസ് ഓര്‍ത്തഡോക്‌സ് ചാപ്പലിലും ആക്രമണം ഉണ്ടായി. ഗ്ലാസ് ഡോറും പരുമല തിരുമേനിയുടെ ഫോട്ടോയുമാണ് നശിപ്പിച്ചത്. സംഭവത്തില്‍ പൊലീസ് അന്വേഷണം ഊര്‍ജിതമാക്കിയിട്ടുണ്ട്. ഓര്‍ത്തഡോക്‌സ് യാക്കോബായ സഭാ വിഭാഗങ്ങള്‍ തമ്മിലുള്ള തര്‍ക്കങ്ങള്‍ക്കിടെയാണ് സംഭവം. ഓര്‍ത്തഡോക്‌സ് സഭ ആസ്ഥാനത്തിന് പൊലീസ് സുരക്ഷ ഏര്‍പ്പെടുത്തിയിട്ടുണ്ട്.
