മലപ്പുറം: മലപ്പുറത്തെ വെന്നിയൂരിൽ കെ സ്വിഫ്റ്റ് ബസിൽ യുവതിയെ കുത്തിപ്പരിക്കേൽപ്പിച്ച ശേഷം യുവാവ് സ്വയം കഴുത്തറുത്തു. മൂന്നാർ- ബെംഗളൂരു ബസിൽ വ്യാഴാഴ്ച രാത്രി 11 മണിയോടെയാണ് സംഭവം.
ബസ് വെന്നിയൂരിൽ എത്തിയപ്പോൾ യുവാവ് കത്തികൊണ്ടു യുവതിയുടെ നെഞ്ചിൽ കുത്തുകയായിരുന്നു. തുടർന്ന് യുവാവു സ്വയം കഴുത്തറക്കുകയും ചെയ്തു.
ഗൂഡല്ലൂർ സ്വദേശിയായ സീതയെ വയനാട് സ്വദേശിയായ സനൽ ആണ് ആക്രമിച്ചത്. മൂന്നാറിൽനിന്നു ബെംഗളൂരുവിലേക്ക് പോകുകയായിരുന്നു ബസ്. വെന്നിയൂരിൽ എത്തിയപ്പോഴാണ് സംഭവം.
ഇരുവരെയും ഉടൻ തിരൂരങ്ങാടിയിലെ സ്വകാര്യ ആശുപത്രിയിൽ എത്തിച്ചെങ്കിലും പരിക്ക് ഗുരുതരമായതിനാൽ പിന്നീട് കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി.
യുവതി അങ്കമാലിയിൽ നിന്നും യുവാവ് എടപ്പാളിൽനിന്നുമാണ് ബസിൽ കയറിയതെന്നാണ് വിവരം. ഇരുവരും ബസിന്റെ പിന്നിലെ സീറ്റിലായിരുന്നു. ഭക്ഷണം കഴിക്കാനായി ചങ്കുവെട്ടിയിൽ ബസ് നിർത്തിയിരുന്നു.
യാത്ര പുനരാരംഭിച്ചപ്പോഴാണ് ആക്രമണം നടന്നത്. ഇരുവരും മുൻ പരിചയമുള്ള ആളുകളാണെന്നാണ് സൂചന.ബസിലെ യാത്രക്കാരും ജീവനക്കാരും ചേർന്നാണ് രണ്ടുപേരെയും തിരൂരങ്ങാടിയിലെ സ്വകാര്യ ആശുപത്രിയിൽ എത്തിച്ചത്.
ബസിനകത്ത് രക്തം വാ‍ർന്ന നിലയിലാണ്. യുവാവിൻ്റേത് ആസൂത്രിത ആക്രമണമാണെന്നാണ് പ്രാഥമിക നിഗമനം. സംഭവസ്ഥലത്ത് പോലീസ് എത്തി പരിശോധന നടത്തി.
ആക്രമണത്തിനു ഉപയോഗിച്ച ബ്ലേഡ് കത്തി കണ്ടെത്തി. പോലീസ് കേസെടുത്ത് അന്വേഷണം ആരംഭിച്ചു.
