തിരുവനന്തപുരം : സംസ്ഥാനത്ത് കാലവര്‍ഷം കനക്കുന്നു.തെക്ക്‌ പടിഞ്ഞാറന്‍ കാലവര്‍ഷത്തിന്റെ ഭാഗമായി കേരളത്തിലെ മിക്ക ജില്ലകളിലും ഇന്നലെ വൈകുന്നേരം മുതല്‍ മഴ ശക്തമായി. വരും ദിവസങ്ങളില്‍ മഴ കൂടുതല്‍ ശക്തിപ്രാപിക്കും. വേനല്‍മഴയില്‍ ഡാമുകളിലെ ജലനിരപ്പ് ഉയര്‍ന്നതിനെ തുടര്‍ന്ന് ഷട്ടറുകള്‍ തുറന്ന് വിട്ട തിരുവനന്തപുരം ജില്ലയില്‍ നദികളിലെ ജലവിതാനം അപകടകരമായ സാഹചര്യത്തില്‍ തുടരുകയാണ്. കാലവര്‍ഷം ശക്തമായതോടെ പലയിടങ്ങളിലും നദികള്‍ കരകവിയാന്‍ തുടങ്ങിയിട്ടുണ്ട്. അരുവിക്കര ഡാമിന്റെ ഷട്ടറുകള്‍ തുറന്ന നിലയിലാണ്.
വൃഷ്ടിപ്രദേശങ്ങളില്‍ ശക്തമായ മഴ തുടര്‍‌ന്നാല്‍ നെയ്യാറിന്റെ ഷട്ടറുകള്‍ ഇന്ന് ഉച്ചയോടെ വീണ്ടും തുറക്കുമെന്ന് ജില്ലാ ഭരണകൂടം അറിയിച്ചിട്ടുണ്ട്. ഇന്നലെ രാത്രി മുതല്‍ പെയ്ത ശക്തമായ മഴയില്‍ തിരുവനന്തപുരം നഗരത്തിന്റെ പലഭാഗങ്ങളിലും വീടുകളില്‍ വെള്ളം കയറി. മെഡിക്കല്‍ കോളേജ്, പോങ്ങുംമൂട്, ഗൗരീശപട്ടം, കണ്ണമ്മൂല ഭാഗങ്ങളിലാണ് താഴ്ന്ന സ്ഥലങ്ങളിലെ വീടുകളില്‍ വെള്ളം കയറി തുടങ്ങിയത്. നഗരസഭാ ഉദ്യോഗസ്ഥരും പൊലീസും ഫയ‌ര്‍ഫോഴ്സും സ്ഥലത്തെത്തിയിട്ടുണ്ട്.തെക്ക്‌ കിഴക്കന്‍ അറബിക്കടലില്‍ അനുകൂലഘടകങ്ങള്‍ നിലനില്‍ക്കുന്നതിനാല്‍ മുന്‍കാലങ്ങളില്‍ നിന്ന്‌ വ്യത്യസ്‌തമായി ഒറ്റദിവസം തന്നെ സംസ്ഥാനമാകെ കാലവര്‍ഷം വ്യാപിച്ചു.കേരളം ഉള്‍പ്പെടെയുള്ള ദക്ഷിണേന്ത്യയില്‍ സാധാരണ മഴയുടെ 102 ശതമാനം ലഭിക്കുമെന്നാണ്‌ കേന്ദ്രകാലാവസ്ഥ വകുപ്പിന്റെ വിലയിരുത്തല്‍.
കോഴിക്കോട്‌ ജില്ലയില്‍ ഓറഞ്ച് അലര്‍ട്ടും കൊല്ലം, എറണാകുളം, ഇടുക്കി, തൃശ്ശൂര്‍, മലപ്പുറം, കണ്ണൂര്‍, കാസര്‍കോട്‌ ജില്ലകളില്‍ യെല്ലോ അലര്‍ടും പ്രഖ്യാപിച്ചു. ഒറ്റപ്പെട്ടയിടങ്ങളില്‍ ശക്തമായതോ (115 മില്ലിമീറ്റര്‍വരെ) അതിശക്തമായതോ (115മുതല്‍ 204.5 മില്ലീമീറ്റര്‍) ആയ മഴയ്‌ക്ക്‌ സാദ്ധ്യതയുണ്ട്‌. തീരപ്രദേശങ്ങളിലും മലയോര മേഖലകളിലും താമസിക്കുന്നവര്‍ അതീവ ജാഗ്രത പുലര്‍ത്തണമെന്ന് ദുരന്തനിവാരണ അതോറിട്ടി അഭ്യര്‍ത്ഥിച്ചു.
ലക്ഷദ്വീപിനും കര്‍ണാടക തീരത്തിനുമിടയില്‍ ഉണ്ടായിരുന്ന ന്യൂനമര്‍ദ്ദ മേഖല ഇന്നലെ തീവ്ര ന്യൂനമര്‍ദ്ദമായി മാറി വടക്ക്‌ കിഴക്ക്‌ ദിശയില്‍ സഞ്ചരിക്കുകയാണ്‌. ഗോവക്ക്‌ 360 കിലോമീറ്റര്‍ അടുത്തുള്ള ഈ ന്യൂനമര്‍ദ്ദം ഇന്ന് തീവ്ര ചുഴലിക്കാറ്റായി മാറും. നിസര്‍ഗ എന്ന പേരിലുള്ള ചുഴലിക്കാറ്റുമൂലം കര്‍ണാടക, ഗോവ, മഹാരാഷ്ര എന്നിവിടങ്ങളില്‍ വരും ദിവങ്ങളില്‍ കനത്ത മഴ ലഭിക്കും. വടക്ക്‌ പടിഞ്ഞാറ്‌ ദിശയില്‍ സഞ്ചരിക്കുന്ന ചുഴലിക്കാറ്റ്‌ ഗുജറാത്ത്‌ തീരത്ത്‌ എത്തുമെന്നാണ്‌ നിഗമനം. മഹാരാഷ്ട്ര, ഗുജറാത്ത്‌ തീരങ്ങള്‍ക്ക്‌ മുന്നറിയിപ്പ്‌ നല്‍കിയിട്ടുണ്ട്‌. ചുഴലിക്കാറ്റ്‌ കേരളത്തെ ബാധിക്കില്ല.മത്സ്യത്തൊഴിലാളികള്‍ കടലില്‍ പോകരുതെന്ന്‌ മുന്നറിയിപ്പുണ്ട്‌.
OYNAMAK...