കണ്ണൂര്‍: തലശ്ശേരിയില്‍ കാറില്‍ ചാരി നിന്നതിന്റെ പേരില്‍ യുവാവ് ചവിട്ടി താഴെയിട്ട കുട്ടിയെ മറ്റെരാളും മര്‍ദ്ദിച്ചു.
മുഹമ്മദ് ഷിഹാദിന് മുന്‍പ് കുട്ടിയെ മറ്റൊരു വഴിപോക്കന്‍ ഉപദ്രവിക്കുന്നതിന്റെ സിസിടിവി ദൃശ്യങ്ങള്‍ പുറത്ത്. സംഭവത്തില്‍ അന്വേഷണം ആരംഭിച്ചു.
കുട്ടിയ്‌ക്ക് ചവിട്ടേല്‍ക്കുന്നതിന് മുന്‍പുള്ള ദൃശ്യങ്ങളാണ് പുറത്തുവന്നിരിക്കുന്നത്. കാറിനുള്ളിലേക്ക് നോക്കി നില്‍ക്കുകയായിരുന്നു ആറ് വയസ്സുകാരന്‍ ഗണേശ്.
ആ സമയം അതുവഴി വന്നയാള്‍ ഇത് കണ്ടു. തുടര്‍ന്ന് കുട്ടിയുടെ തലയ്‌ക്ക് അടിക്കുകയായിരുന്നു. തുടര്‍ന്ന് കുട്ടിയുടെ കഴുത്തില്‍ പിടിച്ച്‌ തള്ളുന്നതും ദൃശ്യങ്ങളില്‍ കാണാം.
എന്നാല്‍ പിടിച്ചു മാറ്റിയിട്ടും കുട്ടി വാഹനത്തിന് അടുത്തേക്ക് പോകുകയായിരുന്നു. ഇതിന് പിന്നാലെയാണ് മുഹമ്മദ് ഷിഹാദ് ഗണേശിനെ ചവിട്ടിയത്.
അതേസമയം ചവിട്ടുന്നതിന് പുറമേ ഷിഹാദ് കുട്ടിയുടെ തലയ്‌ക്കടിക്കുന്ന ദൃശ്യങ്ങളും പുറത്തുവന്നിട്ടുണ്ട്. കാറില്‍ ചാരി നില്‍ക്കുകയായിരുന്ന കുട്ടിയെ പുറത്തിറങ്ങി വന്ന ഷിഹാദ് ആദ്യം ഭയപ്പെടുത്തുകയായിരുന്നു.
ഇതിന് പിന്നാലെ കുട്ടിയുടെ തലയ്‌ക്ക് അടിച്ചു. എന്നാല്‍ കുട്ടി അവിടെ തന്നെ നിന്നതോടെ ഷിഹാദ് ചവിട്ടുകയായിരുന്നു.
