കോഴിക്കോട്‌: കാറില്‍ കഞ്ചാവ് കടത്തിയ ദമ്ബതികളടക്കം മൂന്നു പേര്‍ പിടിയില്‍. നല്ലളം അരീക്കാട് ഹസനബി വില്ലയില്‍ ഷംജാദ് (25), ഭാര്യ അനീഷ (23), നല്ലളം അരീക്കാട് പുല്ലാനിപ്പറമ്ബ് ബൈതുല്‍ ഹാലയില്‍ ബി.എം. അഹമ്മദ് നിഹാല്‍ (26) എന്നിവരെയാണ്‌ മെഡി. കോളജ്‌ പൊലീസ് അറസ്റ്റ് ചെയ്‌തത്‌. ഇവരില്‍നിന്ന്‌ രണ്ടു കിലോ കഞ്ചാവ് പിടികൂടി. കാറിലുണ്ടായിരുന്ന മറ്റൊരാള്‍ ഓടി രക്ഷപ്പെട്ടതായി പറയുന്നു.
കണ്ണൂര്‍ ഭാഗത്തുനിന്നുവന്ന കാര്‍ നഗരത്തില്‍ പല ഭാഗത്തും അപകടം വരുത്തുംവിധം വേഗത്തിലോടുന്നത് ട്രാഫിക്‌ പൊലീസിന്‍റെ ശ്രദ്ധയില്‍ പെടുകയായിരുന്നു. അസി. കമീഷണര്‍ പി. രാജുവി‍െന്‍റ നേതൃത്വത്തിലുള്ള സംഘം വിവിധ ഭാഗങ്ങളില്‍ കൈകാണിച്ചും മറ്റും നിര്‍ത്താന്‍ ശ്രമിച്ചിട്ടും ഫലിച്ചില്ല. സംഘമായി പിന്തുടര്‍ന്ന് മെഡി. കോളജ്‌ പൊലീസ് സഹായത്തോടെ പിടികൂടി. പലേടത്തും വാഹനമിടിച്ചതായി പൊലീസ് പറഞ്ഞു.
ഇവര്‍ കാസര്‍കോട് നിന്ന് കഞ്ചാവ് വാങ്ങി വരുകയാണെന്നാണ്‌ പ്രാഥമിക നിഗമനം. ചോദ്യംചെയ്യലിനോട്‌ കാര്യമായി സഹകരിക്കുന്നില്ലെന്നും വിശദമായ ചോദ്യംചെയ്യലിന്‌ ശേഷം വ്യാഴാഴ്ച കോടതിയില്‍ ഹാജരാക്കുമെന്നും പൊലീസ് പറഞ്ഞു. മെഡി. കോളജ്‌ സി.ഐ ബെന്നി ലാലു, എസ്.ഐമാരായ രമേഷ്‌ കുമാര്‍, കെ. ജ്യോതി, രാംദാസ്‌, പൊലീസുകാരായ ലാലിജ്‌, ജംഷീന, അരുണ്‍, രതീഷ്‌, രാഹുല്‍, അനൂപ്‌ എന്നിവരുടെ നേതൃത്വത്തിലാണ്‌ പ്രതികളെ അറസ്റ്റ് ചെയ്‌തത്‌.
