കൊച്ചി: യു.എ.ഇ കോണ്സുലേറ്റ് വഴി എത്തിയ ഖുര് ആന് സംസ്ഥാനത്തിന്റെ വിവിധയിടങ്ങളില് വിതരണം ചെയ്തതുമായി ബന്ധപ്പെട്ട് കസ്റ്റംസിന്റെ ചോദ്യംചെയ്യലിനായി മന്ത്രി കെ ടി ജലീല് കൊച്ചിയിലെ കസ്റ്റംസ് പ്രവിന്റീവ് ഓഫീസില് ഹാജരായി. ഔദ്യോഗിക വാഹനത്തിലാണ് അദ്ദേഹം എത്തിയത്. രാവിലെ പത്തുമണിക്ക് എത്താനാണ് അദ്ദേഹത്തിന് നോട്ടീസ് നല്കിയിരുന്നത്. എന്നാല് ഉദ്യോഗസ്ഥരില് ഒരാള്ക്ക് കൊവിഡ് സ്ഥിരീകരിച്ചതിനെത്തുടര്ന്ന് ഓഫീസ് അണുവിമുക്തമാക്കേണ്ടിവന്നു. അതിനാല് വൈകി ഹാജരായാല് മതിയെന്ന് മന്ത്രിയോട് ആവശ്യപ്പെടുകയായിരുന്നു.
നികുതിവെട്ടിച്ച് നയതന്ത്രചാനല് വഴി ഖുര് ആന് ഇറക്കുമതിയും വിതരണവും പ്രൊട്ടോക്കോള് ലംഘനവും ക്രമക്കേടുമാണെന്നാണ് കസ്റ്റംസിന്റെ കണ്ടെത്തല്. മാര്ച്ച് നാലിനാണ് യു.എ.ഇ കോണ്സുലേറ്റിന്റെ പേരില് മതഗ്രന്ഥമെത്തിയത്. ഉന്നതവിദ്യാഭ്യാസ കൗണ്സിലിന്റെ കീഴിലുള്ള സി ആപ്ടിന്റെ വാഹനത്തിലാണ് ഖുര് ആന് വിതരണം ചെയ്യാനായി കൊണ്ടുപോയത്. മന്ത്രിയുടെ നിര്ദ്ദേശപ്രകാരമാണോ ഖുര് ആന് ഇറക്കുമതി ചെയ്തതെന്നാണ് പ്രധാനമായും അന്വേഷിക്കുന്നത്.
ഖുര് ആന് പാഴ്സലിന് 4479 കിലോ തൂക്കമുണ്ടായിരുന്നു. 250 പായ്ക്കറ്റും. ഒരു മതഗ്രന്ഥത്തിന്റെ തൂക്കം 567 ഗ്രാമാണെന്ന് കസ്റ്റംസ് പരിശോധനയില് വ്യക്തമായി. ഈ പാഴ്സലിന്റെ മറവില് സ്വര്ണം കടത്തിയോ എന്നതിനെക്കുറിച്ചറിയാന് നേരത്തെ എന്ഫോഴ്സ്മെന്റ് ഡയറക്ടറേറ്റും ദേശീയ അന്വേഷണ ഏജന്സിയും ജലീലിനെ ചോദ്യം ചെയ്തിരുന്നു. ഈ രണ്ടുതവണയും അദ്ദേഹമെത്തിയത് സ്വകാര്യ വാഹനങ്ങളിലായിരുന്നു. ഇത് വലിയ വിവാദമാവുകയും ചെയ്തു.