തിരുവനന്തപുരം: 2023-24ലെ മദ്യ നയത്തിന് അംഗീകാരം. ഇന്ന് ചേർന്ന മന്ത്രിസഭായോഗത്തിലാണ് അംഗീകരിക്കാൻ തീരുമാനിച്ചത്.
സംസ്ഥാനത്തെ കള്ളുഷാപ്പുകൾക്ക് സ്റ്റാർ പദവി നൽകുന്നത് അടക്കമുള്ള നിർദ്ദേശങ്ങൾ അടങ്ങിയ പുതിയ മദ്യനയത്തിലാണ് മന്ത്രിസഭയുടെ അംഗീകാരം ഇപ്പോൾ ലഭിച്ചിരിക്കുന്നത്.
കേരള ടോഡി എന്ന പേരിൽ കള്ളിനെ ബ്രാൻഡ് ചെയ്യുമെന്നും മന്ത്രി പറഞ്ഞു.
സംസ്ഥാനത്തെ മദ്യ ഉൽപാദനം വർദ്ധിപ്പിക്കുന്നത് അടക്കമുള്ള നിർദ്ദേശങ്ങൾ പുതിയ മദ്യനയത്തിലുണ്ട്. കള്ളുഷാപ്പുകൾക്കും ബാറുകൾക്ക് സമാനമായി സ്റ്റാർ പദവികൾ ഉണ്ടാകും.
പുതിയ മദ്യനയം അനുസരിച്ച് ബാർ ലൈസൻസിന് വേണ്ടിയുള്ള ഫീസ് ഉയർത്തിയിട്ടുണ്ട്.
ബാർ ലൈസൻസ് ഫീസ് നിരക്ക് അഞ്ച് ലക്ഷം രൂപയാണ് കൂട്ടിയിരിക്കുന്നത്. നിലവിൽ 30 ലക്ഷം രൂപയാണ് ബാർ ലൈസൻസിന് വേണ്ടിയുള്ള ഫീസ്.
ലഭ്യമാകുന്ന പഴവർഗങ്ങളിൽ നിന്നും വീര്യം കുറഞ്ഞ മദ്യം, വൈൻ എന്നിവ ഉൽപാദിപ്പിച്ച് വിതരണം ചെയ്യാനുള്ള നടപടി സ്വീകരിക്കുമെന്ന് തദ്ദേശ എക്സൈസ് വകുപ്പ് മന്ത്രി എം ബി രാജേഷിനെ ഉദ്ധരിച്ച് മാതൃഭൂമി റിപ്പോർട്ട് ചെയ്യുന്നു.
ഇന്ത്യൻ നിർമിത വിദേശമദ്യത്തിന്റെ കയറ്റുമതി പ്രോത്സാഹിപ്പിക്കാനും മദ്യനയത്തിൽ തീരുമാനം എടുത്തിട്ടുണ്ട്. ഇതിനായി ചട്ടങ്ങളിൽ കാര്യമായ ക്രമീകരണങ്ങൾ നടത്തും.
ഇതിന് പുറമെ, ലഹരിവിമുക്ത പ്രവർത്തനങ്ങൾ ശക്തമാക്കാനും പദ്ധതിയിടുന്നതായി മന്ത്രി വ്യക്തമാക്കി.
സംസ്ഥാനത്ത് വിദേശ വിനോദ സഞ്ചാരികൾ കൂടുതലായി എത്തുന്ന പ്രദേശങ്ങളിൽ പ്രവർത്തിക്കുന്ന റെസ്റ്റോറന്റുകളിൽ സീസണിൽ മാത്രം ബിയർ, വൈൻ എന്നിവ വിൽപന നടത്താൻ പ്രത്യേക ലൈസൻസ് അനുവദിക്കാനും മന്ത്രിസഭാ തീരുമാനിച്ചു.
ഒന്നാം തീയതി ഡ്രൈഡേ ഒഴിവാക്കണമെന്ന നിർദ്ദേശം മദ്യനയത്തിൽ ഇല്ലെന്നതും ശ്രദ്ധേയമാണ്.
പുതിയ മദ്യനയം ഏപ്രിൽ മാസത്തിൽ പ്രഖ്യാപിക്കുമെന്നായിരുന്നു നേരത്തെ അറിയിച്ചിരുന്നത്. എന്നാൽ, പിന്നീട് ഇത് വൈകുകയായിരുന്നു.
നിലവിൽ 559 വിദേശമദ്യ ചില്ലറ വിൽപന ശാലകൾക്കാണ് അനുമതിയുള്ളതെങ്കിലും 309 ഷോപ്പുകൾ മാത്രമാണ് പ്രവർത്തിക്കുന്നത്. അടഞ്ഞുകിടക്കുന്നത് തുറന്ന് പ്രവർത്തിക്കാനുള്ള നടപടികളും സ്വീകരിക്കും.
ഐടി പാർക്കുകളിൽ വിദേശമദ്യം വിതരണം ചെയ്യുന്നതിന് ചട്ടഭേദഗതി പ്രക്രിയ നടന്നുകൊണ്ടിരിക്കുകയാണെന്നും മന്ത്രി വ്യക്തമാക്കി. ഐടി പാർക്കുകൾക്ക് പുറമെ വ്യവസായ പാർക്കുകൾക്കും കൂടി ബാധകമാക്കുമെന്നും മന്ത്രി പറഞ്ഞു.
