കണ്ണൂര്‍: കല്യാണം മുടക്കിയതില്‍ കലിപൂണ്ട യുവാവിന്റെ പ്രതികാരം അയ്യപ്പനും കോശിയും സ്റ്റൈലില്. അയല്‍വാസിയുടെ പലചരക്ക് കട മണ്ണുമാന്തിയന്ത്രം ഉപയോഗിച്ച്‌ ഇടിച്ച്‌ നിരത്തുകയാണ് കണ്ണൂരിലെ യുവാവ് ചെയ്തത്. കണ്ണൂര്‍ ജില്ലയിലെ മലയോര മേഖലയായ ചെറുപുഴ പഞ്ചായത്തിലെ ഇടവരമ്ബിനടുത്ത് ഇന്നലെ രാവിലെയാണ് സംഭവം.
ഊമലയില്‍ കച്ചവടംനടത്തുന്ന കൂമ്ബന്‍കുന്നിലെ പുളിയാര്‍മറ്റത്തില്‍ സോജിയുടെ പലചരക്ക് കടയാണ് പ്ലാക്കുഴിയില്‍ ആല്‍ബിന്‍ മാത്യു (31) ജെസിബി കൊണ്ടു തകര്‍ത്തത്. തന്റെ വിവാഹം മുടക്കിയതിനാലാണ് കട തകര്‍ത്തതെന്ന് ആല്‍ബിന്‍ പറഞ്ഞതായി പൊലീസ് പറയുന്നു. സോജി ഇതു നിഷേധിച്ചു.
ആല്‍ബിനെയും കട പൊളിക്കാനുപയോഗിച്ച മണ്ണുമാന്തി യന്ത്രവും ചെറുപുഴ പൊലീസ് കസ്റ്റഡിയിലെടുത്തു. കട പൂര്‍ണമായും തകര്‍ന്ന നിലയിലാണ്. സോജി കടയടച്ച്‌ പോയ സമയത്താണ് അക്രമം ഉണ്ടായത്. ഇയാളെ കോടതി 14 ദിവസത്തേക്ക് റിമാന്റ് ചെയ്തു.
