മുംബൈ: ഇറാനില്‍ നിന്ന് കടല്‍ മാര്‍ഗം കടത്തിയ കോടിക്കണക്കിന് രൂപയുടെ മയക്കുമരുന്ന് പിടികൂടി. സമീപകാലത്ത് നടന്ന ഏറ്റവും വലിയ മയക്കുമരുന്ന് വേട്ടയില്‍ 283 കിലോഗ്രാം ഹെറോയിനാണ് ഡയറക്ട്രേറ്റ് ഓഫ് റെവന്യൂ ഇന്‍റലിജന്‍സ് പിടികൂടിയത്. അന്താരാഷ്ട്ര മാര്‍ക്കറ്റില്‍ ഇതിന് ഏകദേശം 2000 കോടി രൂപ വിലവരും.
നവി മുംബൈയിലെ ജവഹര്‍ലാല്‍ നെഹ്റു തുറമുഖത്ത് നിന്ന് പഞ്ചാബിലേക്ക് റോഡ് മാര്‍ഗം കടത്താനായിരുന്നു പദ്ധതിയെന്ന് ഡി.ആര്‍.ഐ പറഞ്ഞു. കണ്ടുകെട്ടിയ ഹെറോയിന്‍ രണ്ട് പാത്രങ്ങളില്‍ ടാല്‍ക്കം കല്ലുകളാല്‍ ഒളിപ്പിച്ചു വെക്കുകയായിരുന്നു. മയക്കുമരുന്ന് വിതരണക്കാരനായ പഞ്ചാബ് സ്വദേശി പ്രഭ്ജിത് സിങ്ങിനെ അറസ്റ്റ് ചെയ്തു. കേസുമായി ബന്ധപ്പെട്ട് മധ്യപ്രദേശില്‍ നിന്ന് രണ്ടുപേരും വലയിലായിട്ടുണ്ട്.
ജൂണ്‍ 28ന് ഡല്‍ഹി വിമാനത്താവളത്തില്‍ വെച്ച്‌ 126 കോടിയുടെ ഹെറോയിനുമായി രണ്ട് ദക്ഷിണാഫ്രിക്കന്‍ പൗരന്‍മാര്‍ അറസ്റ്റിലായിരുന്നു. ആറ് മാസത്തിനിടെ ഡല്‍ഹി വിമാനത്താവളത്തില്‍ നിന്ന് 600 കോടിയുടെ ഹെറോയിനാണ് പിടികൂടിയിരിക്കുന്നത്.
ഇറാനില്‍ നിന്ന് കടല്‍ മാര്‍ഗം കടത്തിയ കോടിക്കണക്കിന് രൂപയുടെ മയക്കുമരുന്ന് പിടികൂടി
