കൊച്ചി: തുടര്‍ച്ചയായി അഞ്ചാം ദിവസവും പെട്രോള്‍, ഡീസല്‍ വിലകള്‍ വര്‍ധിച്ചതോടെ ഇന്ധനവില കഴിഞ്ഞ രണ്ട് വര്‍ഷത്തിനിടയിലെ ഏറ്റവും ഉയര്‍ന്ന നിലയില്‍. ഞായറാഴ്ച പെട്രോള്‍ ലിറ്ററിന് 28 പൈസയും ഡീസലിന് 29 പൈസയുമാണ് വര്‍ധിച്ചത്. തിരുവനന്തപുരം ഉള്‍പ്പെടെ സംസ്ഥാനത്തെ പല കേന്ദ്രങ്ങളിലും പെട്രോള്‍ വില 85 രൂപയിലെത്തി. ഞായറാഴ്ച തിരുവനന്തപുരത്ത് പെട്രോളിന് 85.41 രൂപയും ഡീസലിന് 79.38 രൂപയുമാണ് വില. കൊച്ചിയില്‍ യഥാക്രമം 83.93 രൂപയും 77.88 രൂപയും. ഭൂരിഭാഗം ജില്ല ആസ്ഥാനങ്ങളിലും വില 85 രൂപയില്‍ താഴെയാണെങ്കിലും ദൂരപരിധിയനുസരിച്ച്‌ മാറ്റം വരുന്നതിനാല്‍ നഗരത്തിന് പുറത്തെ മിക്ക സ്ഥലങ്ങളിലും 85ലെത്തി.2018 സെപ്റ്റംബറിലാണ് ഇതിനുമുമ്ബ് നിലവിലേതിന് സമാന നിരക്കിലേക്ക് ഇന്ധനവില ഉയര്‍ന്നത്. അന്ന് തിരുവനന്തപുരത്ത് പെട്രോളിന് 84.33 രൂപയും ഡീസലിന് 78.25 രൂപയുമായിരുന്നു. അസംസ്കൃത എണ്ണവിലയിലെ വര്‍ധനയാണ് ഇന്ധനവില കുത്തനെ വര്‍ധിപ്പിക്കാന്‍ കാരണമായി എണ്ണക്കമ്ബനികള്‍ പറയുന്നത്. അന്താരാഷ്ട്ര വിപണിയില്‍ നവംബര്‍ 10ന് ബാരലിന് 43.61 ഡോളറായിരുന്ന എണ്ണക്ക് ഇപ്പോള്‍ 48.18 ഡോളറാണ്. എന്നാല്‍, എണ്ണവിലയിലെ നേരിയ വര്‍ധനയുടെ പേരില്‍പോലും ഇന്ധനവില കൂട്ടുന്ന കമ്ബനികള്‍ എണ്ണവില കുത്തനെ ഇടിഞ്ഞ സന്ദര്‍ഭങ്ങളിലൊന്നും വില കുറച്ചില്ല. വിലക്കുറവിെന്‍റ നേട്ടം ഉപഭോക്താക്കള്‍ക്ക് ലഭിക്കാത്തവിധം കേന്ദ്രസര്‍ക്കാര്‍ എക്സൈസ് നികുതി ഉയര്‍ത്തുകയും ചെയ്തു.നവംബര്‍ ഒന്നിനുശേഷം സംസ്ഥാനത്ത് പെട്രോളിന് 2.52 രൂപയും ഡീസലിന് 3.47 പൈസയും വര്‍ധിച്ചു. വിലവര്‍ധന വരുംദിവസങ്ങളിലും തുടരുമെന്നാണ് സൂചന. രണ്ട് മാസത്തോളം വിലയില്‍ കാര്യമായ മാറ്റമില്ലാതിരുന്നതിന് ശേഷമാണ് ഓരോ ദിവസവും വില വര്‍ധിപ്പിച്ചുതുടങ്ങിയത്.
ഇന്ധനവില കത്തുന്നു; രണ്ടുവര്‍ഷത്തെ ഉയര്‍ന്ന നിരക്കില്‍
