ന്യൂഡല്‍ഹി: ഇന്ത്യയില്‍ കോവിഡ് മരണം 1007 ആയി. 31,332 പേര്‍ക്ക് രോഗം സ്ഥിരീകരിച്ചു. 7696 പേര്‍ രോഗമുക്തരായി. കഴിഞ്ഞ 24 മണിക്കൂറിനിടെ 73 പേരാണ് മരിച്ചത്. 1897 പേര്‍ക്ക് രോഗം സ്ഥിരീകരിക്കുകയും ചെയ്തു. ഇതേ കാലയളവില്‍ 827 േപര്‍ രോഗമുക്തരായതായും കേന്ദ്ര ആരോഗ്യമന്ത്രാലയം അറിയിച്ചു.
കോവിഡ് വ്യാപനം തടയാന്‍ ലോക്ഡൗണ്‍ പ്രഖ്യാപിച്ചിട്ടും മഹാരാഷ്ട്രയിലും ഗുജറാത്തിലും രോഗബാധിതരുടെ എണ്ണം വര്‍ധിക്കുകയാണ്. മഹാരാഷ്ട്രയില്‍ 9318 പേര്‍ക്കാണ് കോവിഡ് കണ്ടെത്തിയത്. മരണസംഖ്യ 369 ആയി. ഗുജറാത്തില്‍ രോഗബാധിതരുടെ എണ്ണം 3744 ആയി. 162 പേര്‍ കോവിഡ് ബാധിച്ച്‌ മരിച്ചു.
ഡല്‍ഹിയില്‍ 3314 പേര്‍ക്ക് കോവിഡ് സ്ഥിരീകരിക്കുകയും 54 പേര്‍ മരിക്കുകയും ചെയ്തു. രാജസ്ഥാനില്‍ 19 പേര്‍ക്കു കൂടി രോഗം സ്ഥിരീകരിച്ചതോടെ ആകെ വൈറസ് ബാധിതരുടെ എണ്ണം 2383 ആയി. 46 പേര്‍ക്ക് ജീവന്‍ നഷ്ടമായി.
