ഹീറോ മോടോകോര്‍പ്
ഇരുചക്രവാഹന നിര്‍മാതാക്കളായ ഹീറോ മോടോകോര്‍പ് തങ്ങളുടെ മോടോര്‍സൈകിളുകളുടെയും സ്കൂടറുകളുടെയും വില ഏപ്രില്‍ അഞ്ച് മുതല്‍ 2000 രൂപ വരെ വര്‍ധിക്കുമെന്ന് അറിയിച്ചു. എന്നാല്‍, മോഡലിന്റെയും മറ്റും അടിസ്ഥാനത്തിലായിരിക്കും ഇത്.
ടൊയോട കിര്‍ലോസ്‌കര്‍ മോടോര്‍
മോഡലുകളുടെ വില ഏപ്രില്‍ ഒന്ന് മുതല്‍ നാല് ശതമാനം വരെ പുനഃക്രമീകരിക്കുമെന്ന് ടൊയോട കിര്‍ലോസ്‌കര്‍ മോടോര്‍ അറിയിച്ചു. അസംസ്‌കൃത വസ്തുക്കള്‍ ഉള്‍പെടെയുള്ള ഇന്‍പുട് ചെലവ് വര്‍ധിച്ചതാണ് കാരണമെന്ന് കംപനി അറിയിച്ചു.
ബിഎംഡബ്ല്യു ഇന്‍ഡ്യ
ആഡംബര വാഹന നിര്‍മാതാക്കളായ ബിഎംഡബ്ല്യു ഇന്‍ഡ്യ ഏപ്രില്‍ ഒന്ന് മുതല്‍ തങ്ങളുടെ മോഡല്‍ ശ്രേണിയിലുടനീളം വില 3.5 ശതമാനം വരെ വര്‍ധിപ്പിക്കുമെന്ന് അറിയിച്ചു. മെറ്റീരിയല്‍, ലോജിസ്റ്റിക്‌സ് ചെലവുകള്‍ എന്നിവയ്ക്ക് പുറമെ ഭൗമരാഷ്ട്രീയ സാഹചര്യത്തിനും വിനിമയ നിരക്ക് പ്രഭാവത്തിനും ആവശ്യമായ ക്രമീകരണമാണ് വില വര്‍ധനയെന്ന് ബന്ധപ്പെട്ടവര്‍ പറഞ്ഞു
മെഴ്‌സിഡസ്-ബെന്‍സ് ഇന്‍ഡ്യ
മെഴ്‌സിഡസും തങ്ങളുടെ ഉല്‍പന്നങ്ങളുടെ വില ഏപ്രില്‍ ഒന്ന് മുതല്‍ ഏകദേശം മൂന്ന് ശതമാനം വര്‍ധിപ്പിക്കുന്നു. കാറിന്റെ വില കുറഞ്ഞത് 50,000 രൂപ വരെ വര്‍ധിപ്പിക്കാമെന്നും പരമാവധി ഏകദേശം അഞ്ച് ലക്ഷം രൂപ വരെ ഉയരുമെന്നും കംപനി അറിയിച്ചു. എ-ക്ലാസ്, ഇ-ക്ലാസ്, എസ്-ക്ലാസ് ലിമോസിനുകള്‍, ജിഎല്‍എ, ജിഎല്‍സി, ജിഎല്‍എസ് എന്നിവയ്ക്ക് പുറമെ എഎംജി ജിടി 63എസ് ഫോര്‍ ഡോര്‍ കൂപെ എന്നിവയിലും വിലയിലെ മാറ്റം പ്രകടമാവും.
ഓഡി ഇന്‍ഡ്യ
ജര്‍മന്‍ ആഡംബര കാര്‍ നിര്‍മാതാക്കളായ ഓഡി ഏപ്രില്‍ ഒന്ന് മുതല്‍ ഇന്‍ഡ്യയില്‍ തങ്ങളുടെ വാഹനങ്ങളുടെ വില വര്‍ധിപ്പിക്കാന്‍ ഒരുങ്ങുന്നതായി പ്രഖ്യാപിച്ചു. ഇന്‍ഡ്യയിലെ മുഴുവന്‍ ഉല്‍പന്ന ശ്രേണിയിലും മൂന്ന് ശതമാനം വരെ വില വര്‍ധിപ്പിക്കുമെന്ന് ബന്ധപ്പെട്ടവര്‍ അറിയിച്ചു.
ടാറ്റ മോടോഴ്സ്
ഏപ്രില്‍ ഒന്ന് മുതല്‍ വ്യക്തിഗത മോഡലുകളും വേരിയന്റുകളും അനുസരിച്ച്‌ വാണിജ്യ വാഹനങ്ങളുടെ വില രണ്ട് മുതല്‍ 2.5 ശതമാനം വരെ വര്‍ധിപ്പിക്കുമെന്ന് ടാറ്റ മോടോഴ്സ് മാര്‍ച് 22 ന് പ്രഖ്യാപിച്ചിരുന്നു.
