തൃശൂര്‍: ആനപ്രേമികളുടെ പ്രിയങ്കരനായ തലപ്പൊക്കത്തിന്റെ ചക്രവര്‍ത്തി മംഗലാംകുന്ന് കര്‍ണന്‍ ചരിഞ്ഞു. 60 വയസായിരുന്നു. പ്രായാധിക്യത്തിന്റേതായ പ്രശ്‌നങ്ങള്‍ കുറച്ചുകാലമായി ആനയെ അലട്ടിയിരുന്നു. ഇന്ന് പുലര്‍ച്ചെയാണ് ആന ചരിഞ്ഞത്‌. ഹൃദയാഘാതമാണ് മരണ കാരണമെന്നാണ് പ്രാഥമിക നിഗമനം. സംസ്‌ക്കാരം ഇന്ന് വാളയാര്‍ വനത്തില്‍ നടക്കും.തലയെടുപ്പ് മത്സര വേദികളില്‍ നിരവധി തവണ വിജയിച്ചിട്ടുളള കര്‍ണന്‍ മംഗലാംകുന്ന് പരമേശ്വരന്‍, ഹരിദാസ് സഹോദരങ്ങളുടെ ഉടമസ്ഥതതയിലുളള ആനയാണ്. വടക്കന്‍ പറവൂരിലെ ചക്കുമരശേരി ശ്രീകുമാര ഗണേശക്ഷേത്രത്തിലെ തലപ്പൊക്ക മത്സരത്തില്‍ തുടര്‍ച്ചയായി ഒമ്ബതുവര്‍ഷം വിജയിയായിരുന്നു കര്‍ണന്‍. ഇത്തിത്താനം ഗജമേളയിലും കര്‍ണന്‍ വിജയിച്ചിട്ടുണ്ട്. എഴുന്നളളത്ത് തുടങ്ങും മുതല്‍ തിടമ്ബ് ഇറക്കുംവരെ ആത്മവിശ്വാസം തുളുമ്ബുന്ന പ്രൗഢമായ നില്‍പ്പാണ് കര്‍ണന്റെ പ്രത്യേകത. ഇരിക്കസ്ഥാനത്തുനിന്ന് നോക്കുമ്ബോള്‍ 302 സെന്റീമീറ്ററാണ് ഉയരം. 1991ല്‍ വാരണാസിയില്‍ നിന്നാണ് കര്‍ണന്‍ കേരളത്തിലെത്തുന്നത്.
ആനപ്രേമികളുടെ പ്രിയങ്കരനായ മംഗലാംകുന്ന് കര്‍ണന്‍ ചരിഞ്ഞു
