കമ്പം: അരിക്കൊമ്പന്റെ ആക്രമണത്തില്‍ പരിക്കേറ്റയാള്‍ മരിച്ചു. തമിഴ്‌നാട് കമ്പം സ്വദേശി പാല്‍രാജ് ആണ് മരിച്ചത്.
കമ്പം ടൗണില്‍ അരിക്കൊമ്പനെ കണ്ട് ഭയന്ന് വാഹനത്തില്‍ നിന്ന് വീണ പാല്‍രാജ് (65) ആണ് മരിച്ചത്.
ചൊവ്വാഴ്ച പുലര്‍ച്ചെയാണ് മരിച്ചത്. തലയ്ക്ക് പരിക്കേറ്റതാണ് മരണകാരണമെന്ന് ആശുപത്രി അധികൃതര്‍ അറിയിച്ചു.പാല്‍രാജ് തേനി മെഡിക്കല്‍ കോളജ് ആശുപത്രിയില്‍ ചികിത്സയിലായിരുന്നു.
കഴിഞ്ഞദിവസം കമ്പം ടൗണില്‍ എത്തിയ അരിക്കൊമ്പന്‍ ടൗണിലൂടെ ഓടി നടക്കുകയും വാഹനങ്ങള്‍ക്കു നേരെ ആക്രമണം അഴിച്ചുവിടുകയും ചെയ്തിരുന്നു.
ഇതിനിടെ അരിക്കൊമ്പന്റെ മുന്നില്‍പ്പെട്ട ഇദ്ദേഹം വാഹനത്തില്‍ നിന്ന് നിലത്ത് വീണ് തലയ്ക്ക് ഗുരുതരമായ പരിക്കേറ്റിരുന്നു.
തുടര്‍ന്ന്, കമ്പം ആശുപത്രിയില്‍ പ്രവേശിപ്പിച്ചു. ആരോഗ്യനില ഗുരുതരമായി തുടര്‍ന്നതോടെ തേനി മെഡിക്കല്‍ കോളജ് ആശുപത്രിയിലേക്ക് മാറ്റുകയായിരുന്നു. അദ്ദേഹത്തിന്റെ മൃതദേഹം നിലവില്‍ മെഡിക്കല്‍ കോളജ് ആശുപത്രി മോര്‍ച്ചറിയിലാണ് ഉള്ളത്.
തലയ്ക്ക് പുറമെ പാല്‍രാജിന്റെ ആന്തരികാവയവങ്ങള്‍ക്കും പരിക്കേറ്റിരുന്നെന്നാണ് സൂചന. എല്ലുകള്‍ ഒടിഞ്ഞുപോയിരുന്നു. ആന്തരിക രക്തസ്രാവം ഉണ്ടായിരുന്നെന്നും ഡോക്ടര്‍മാര്‍ പറഞ്ഞു.
പോസ്റ്റ്‌മോര്‍ട്ടം നടപടികള്‍ക്കു ശേഷം മൃതദേഹം ബന്ധുക്കള്‍ക്ക് വിട്ടുനല്‍കും.